34
Judah Gam'a Josiah Vaihop
1 Judah gam'a Josiah leng ahung chan chun kum nga bou anahi nalaijin ahi, chuleh Jerusalem'a chun kum somthum le khat vai anahom'in ahi.
2 Ama hi Pakai lunglam tah in anachon'in ahi. Ama hin apului leng David chonna ana juijin Pathen dan ho jouse ana jui bukim'in ahi.
3 Josiah chu khangdongcha kumget ahi kum'in leng ana changin, aman apului leng David Pathen chu ana houvin, kumli jouvin Asherah pathen lim kisemthu namdang te pathen houna mun jouse doi phungho chu ana suse sohkeijin ahi.
4 Ama thupeh dungjuijin Baal kihouna jouse leh ahalnamna maicham jouse amiten ana ban suhset un, Asherah houna limsemthu ho leh doiphung ho jouse asugoi sellin, anahou ho lhan chungah ana theuvin ahi.
5 Aman hiche semthu pathen leh doihouna thempu ho gu chu amaicham chung uva ahalin, Judah le Jerusalem ana suthengin ahi.
6 Aman hitima chun Manasseh, Ephraim leh Simion leh sahlanga Naphtali gam geijin ana ban suhthengin ahi.
7 Alenggam sahlang gamho geijin Asherah semthu pathen houna maicham phungho geijin adoi hounau leh gimnamtui ahalnam nau maicham geijin avochipmin asubong sellin ahi. Hiche jou chun Jerusalem langa akile bep in ahi.
8 Aman hitia hi gamdang pathen houna asuhbeija gamsung leh Hou-In sung asuhtheng jouvin Josiah lengpan Pakai a Pathen Hou-In sempha dingin mi thum asol'in amaho chu: Azaliah chapa Shaphan, Jerusalem vaipo pipui Maaseiah leh thusim hethem tah Joahaz chapa Joah ahiuve.
9 Levi te Hou-In ngah a panghon sum ahin dondoh hou chu thempulen Hilkiah henga apelutnun ahi. Hiche sum chu Ephraim leh Manasseh chuleh sahlam lenggam jouse Judah, Benjamin leh Jerusalem mipite ho jousea konna kidongdoh sum ahi.
10 Hiche sum chu Hou-In sempha dinga kinganse mi thum ho kom'a chun apelutnun ahi, chuleh ama hon thingthem bol chuleh insa ho chu song leh thing achoh uva Judah lengpan ana monlhah sah ho semphat nan amangun ahi.
12 Hiche kintong ho chun kitah-tah in Merari phunga konna Jahath le Obadiah, chuleh Kohath phunga kon Zechariah leh Meshullam, amaho hin ana lamkaijun ahi. Hiche Levi ho hi tumging saithem cheh ahiuvin
13 Levi dang ho chu thil thah le leh natoh jat chom-chom'a natongho chunga vaihom in apangun chuleh adang hon thuching leh miveng bitnin apangun ahi.
Hilkiah In Pathen Dan Amudoh
14 Sum chu akoina a konna akilahdoh chun, Pathen'in Mose anapeh Pakai Danbu chu Hilkiah in ahin mudoh in ahi.
15 Aman Shaphan jah a, “Keiman Hou-In sungah Danbu chu kamudoh tai” ati. Aman lekhajol chu Shaphan apen ahi.
16 Shaphan chun lekhabu chu achoijin lengpa kom'ah hiti hin thu aga lhut e, “Keihon nangma thupeh bang bangin katongun ahi.
17 Keihon Hou-In'a kikoi sum chu kalauvin natong ho leh avesuija pang ho kapeuvin ahi.
18 Shaphan in jong lengpa jah a, “Hilkiah thempu in eipeh lekhajol chu kahin choije,” ati. Hijeh chun Shaphan in lengpa jah a asim phongin ahi.
19 Lengpan lekha kisim chu ajah phat in lunglha tah in apon abotkeh in ahi.
20 Hichun Hilkiah leh Shaphan chapa Ahikam, Micaiah chapa Acbor, chuleh thutanna mun'a lekha jihpa Shaphan chuleh lengpa kithopi a pang Asaiah amaho cheng kom'a chun thu apen:
21 “Nangho cheuvin lang keima ding leh tuni geija Israel te leh Judah te gamsunga cheng nalai mipi ho dingin Pakai chu eigadoh peh un. Hiche lekhabu thuhil ho jong gahe chenun. Ipu ipa teuvin Pakai thupeh ana juilou jeh uleh hiche lekha hin asei dungjuiya anatoh lou jeh un Pakai ichung uvah alunghang tan ahi,” ati.
22 Lengpa thupeh dungjuijin Hilkiah leh aloiho acheuvin Jerusalem munthah langa cheng themgao numei Huldah chu gadong uvin ahi. Ajipa Shallum chu Tikvah chapa, Hasrah chapa, Hou-Ina von ho vesuija panga ahi.
23 Amanun amaho jah a, “Pakai, Israel Pathen chun thu aseije! Nahin solpau henga kinungle uvin lang,
24 'Pakaijin hiti hin aseije: Keiman akhopi leh amipi ho jouse chunga hahsatna ka lhunsah ding ahi. Lekhajol a kisun Judah lengpa chunga kisun gaosapna ho hi hung guilhung ding ahi.
25 Ajeh chu ama hon keima eipaidoh un Jerusalem chungah ka lunghanna akoudoh sah tauvin ahi. Hiche hi mit theilou ding ahi,'” atipeh in ahi.
26 “Ahin Pakai hol dia nasol'a Judah lengpa henga chen lang gaseipeh in: 'Hiche hi Pakai, Israel Pathen'in, na thujah chung chang thua chu asei ahi:
27 Nangin hiche lekhabu a kisei hi nangaijin, chuleh nangman Jerusalem leh amipi te kagihna ho najah phat in nalung naheijin ka angah naki sunem'in navon nasat tellin nakap jengin ahileh keiman nataona ka ngaipeh tai, tin Pakaijin aseije.
28 Hijeh chun Jerusalem chunga ka engbolna ding nangma thijou tengleh bou ka guilhun sah ding ahi. Keiman nangvang lung monga kathisah ding ahi,” ati.
Hichun ama hon hiche thuthot chu apouvin lengpa kom'ah akile tauve.
Josiah In Hou Athahsem
29 Josiah lengpan Judah leh Jerusalem'a lamkai ho jouse chu akou khom'in ahi.
30 Chule lengpa chu Pakai Hou-Ina Judah le Jerusalem'a mijouse toh, thempuho le Levi te toh mipi jouse chu akal touvun ahi. Chu a chun Hou-Insunga kimu Kitepna Lekhabu chu lengpan ahin simdoh tan ahi.
31 Lengpa chu khom kom'a lengte thuneina kilah in Pakai umpina noiyah kitepna asuhing kit in ahi. Lekhajol a kisun Pakai thu dungjuiya athupeh nit ding dol ho chu nit ding chun kitepna ananeijin ahi.
32 Aman Benjamin mipite leh chuche petna Jerusalem'a um jouse chu hiche kitepna jui dingin anopsah tan ahi. Hiti chun Jerusalem'a mipite chu akitem'un, apu apa teu Pathen toh kikah a kitepna chu ana hinsah kit tauvin ahi.
33 Josiah lengpa chun Israel mipi ten gamsunga um kidah umtah doiphung ho jouse chu ana sumang soh in, ama hinlai sungin mipi te chu apu apa teu Pakai, Pathen bou anahou sah in ahi.