35
Josiah in Kalchuh Kut Aman
1 Chuin Lengpa Josiah in Jerusalem khopia Kalchuh Kut man dingin aphongdoh in, hijeh chun Kalchuh adia kelngoi chu lhamasa nisom le li nikho chun akithat tan ahi.
2 Aman thempu ho chu Hou-In'a kin atohna diuvin ngansena ana neijin chuleh ninglhing tah a atoh diuvin ana tilkhouvin ahi.
3 Aman Israel te hil dingin Levi te chu Pakai kin tong dingin athulhah in hitin ana seije: “Kitepna thengtah Thingkhong hi David chapa Solomon lengpan ana sah Hou-In'a chun koijun, tua patna hiche Thingkhong hi napoh le-le tahlou diu amavang na Pakai na Pathen leh amite Israel mipite kinjeng bou nabol diu ahi.
4 Hiti chun naphung dungjuijun David lengpa leh achapa Solomon lengpan mopohna napeh dungjuijin pan lauvin,” ati.
5 “Chuleh mi phabep in Israel mipite a insung dungjui cheh a napanhu theina diuvin kihomtoh un.
6 Nanghon kelngoi leh kelcha ho natha diu ahi. Tun nangho houdan dungjuijin kisuthengun chuleh pumgo thilto ding kigontoh un Pakaijin alhacha Mose mangcha a Pakaijin napeh u thuhil chu nasopi hou Israel chaten jong ajui theina diuvin,” ati.
7 Kalchuh Kut teng mipi hon amanchah theina diuvin Josiah lengpan gancha ho lah a kon'in, kelngoi chal, kelngoi, keltahnou 30,000 leh bongchal 3,000 atohdoh in ahi.
8 Lengpa noija natong lamkai hon jong mipi ho leh thempuho Levi ho manchah dingin kipehna anei cheh un ahi. Hou-In vesui ding a lamkai ho Hilkiah, Zechariah leh Jehiel amaho hin thempu ho dingin kelngoi leh kelcha dang ho 2,600 chuleh bongchal 300 kut sunga pumgo thilto dingin apeuvin ahi.
9 Levi lamkai ho – Conaniah, Shemaiah chuleh Nethanel, chujongle Hashabiah, Jeiel Jozabad – amaho hin kelngoi kelchal dongho 5,000 ahin tohdoh un chuleh bongchal 500 Levi ten pumgo thiltoa dingin ahin tohdoh un ahi.
10 Kalchuh Kut a dinga thil jouse akigontoh phat in thempu ho leh Levi ten lengpa thupeh bangin amun cheh u ahin kilo tauvin ahi.
11 Kelngoi atha jouteng uleh, Levi ten avun'u alip diu chujou teng thempu hon thisan chu maicham a athe diu ahi.
12 Chutengleh ama hon a insonna atum tuma ahopkhen diu pumgo thilto dinga gancha chu ahoppeh diu hitia chu Mose dan dungjuiya atoh ding dan kisei chu ajui diu ahi.
13 Levi ten atoh ding dan kihilna dungjuiya pumgo thilto ho chu meichunga ago diu chuleh akitohdoh atheng ho chu, khangbel, bel bilneija ahonhul diu chuleh saho chu gangtah a mipilah a ahopdoh diu ahi.
14 Hiche jouteng, Levi ten amaho ding leh Aaron son toh achan cheh diuva akigontoh diu ahi, ajeh chu thempuho hi asago diu chuleh akitohdoh ho apumpi leh asathao ho chu ago diu jan geija aboipi diu ahi.
15 Levi phunga Asaph son tumging saithem ho chu leng David in ana gontoh a kihilna banga tumging saithem ho: Asaph, Heman le Jeduthun chuleh lengpa themgao hon ama-ama mun cheh akilo diu ahi. Hou-In kelkot vengho adinnau mun cheh chu alhakang loudiu ahi. Ajeh chu Levi ten amaho dinga Kalchuh Kut chu agonpeh diu ahi.
16 Hitia chu Josiah lengpan athupeh bang-banga chu hiche nikhoa Pakai houkhomna le Kalchuh Kut leh maicham a pumgo thilto ho chu chelha ding ahi.
17 Hiche nikhoa um Israel mipi ho chun nisagi sungin Kalchuh Kut leh Cholsolou Changlhah Kut chu amangun ahi.
18 Samuel themgaopa khanga patnin Kalchuh Kut chu Josiah lengpa, thempuho, Levi te leh Judah Israel leh Jerusalem mipi ten aman bang uva hi kimang khalou ahi.
19 Hiche hi Josiah vaihom sung kum som le get lhinna thilsoh ahi.
Kidouna A Josiah Thi
20 Josiah lengpan hiche ho jouse hi Hou-In'a atochai phat in, Egypt lengpa Neco Eupharates vadung chung lang Carchemish ah galsat din ahungin ahileh Josiah in suhtang ding ana gon ahi.
21 Ahinlah Neco in Josiah chu hiche thu hi athot nin,
“Judah lengpa galsat dinga kahung kon hi nang douna ahipoi nang toh kisat dinga kahung ahipoi, ka galmite toh kisat dinga kahung ahi. Pathen'in gangtah a cheloi dinga eihin sol ahin, Pathen hi kei langa apange nei dou hih in, aman na suhmang ding ahi,” ati.
22 Ahinlah Josiah chun kisatpi tei dingin pan alatan ahi. Aman Neco lengpa a konna Pathen thusei chu anahsah tapon hiti chun aman vonchom akivonin Megiddo phaija galsat din alut nin ahi.
23 Gal akisat tauvin lengpa Josiah chu thal chang khatnin ahin khatan ahileh asohpa kom'a chun eipodoh tan keima kaki sukha tai!” ati.
24 Ama hon asakol kangtalaija kon chun apomdoh un Sakol kangtalai achom khatnah ahengun Jerusalem langa apolut tauvin ahi. Hichea chun ama athitan lengte lhannah avui tauvin ahi. Judah mi pumpin ama thi chu alunghem piuvin ahi.
25 Themgao Jeremiah in Josiah chung changa lunghemna la anasem'in ahi. Israel gamsunga lasathem numei pasal hon ama chunga lunghempina anei teng chuleh hiche la hi asaji uvin ahi. Hiche la hi Lunghempina Labu kikhol khom ho lah a akoijun ahi.
26 Josiah in abol jouse Pakaiya dinga kiphongdoh ho, Dan jui ding akhoh sahna ho,
27 abul apat achaina gei Israel Leh Judah Lengte Thusimbu a akijihlut in ahi.