5
1 Hiti chun Solomon chun Pakai Hou-In a anatoh ding jouse atong chaitai. Chuin Aman apa David in ana lhandohsa thilto ho: sana, dangka thil jatchom chom tamtah chu Pathen Hou-In achun ahin polutnin gouthil koina a chun akoitai.
Hou-In'a Thingkhong Kipohlut
2 Chuin Solomon chun Israel upaho, aphung khaiya aluboh ho, Israel te pu le pa lhah a insung lamkai ho akou khomin ahi. Amaho chun Pathen Thingkhong chu aumna mun Zion tia kihe David khopia konna Hou-In a chu ahin putlut diu ahi.
3 Chuti chun Israel pasal ho chu kumseh a chavang laiya kimangji, Lhambuh Kut kimanna mun a lengpa angsunga chun akikhom tauvin ahi.
4 Israel upaho jouse ahunglhun phat uchun Levi te chun thingkhong chu adomdoh un ahi.
5 Chuin thempu ho leh Levi te chun thingkhong le ponbuh chule atil'apatna asunga ana umsa thil theng ho chu ahin polut tauve.
6 Hichun thingkhong masanga leng Solomon le Israel mipi chun kelngoi ho, kelchaho chule bong atam a tam, simjou hilou chu Pathen adin alhandoh tauve.
7 Hichun thempu ho chun Pakai Thingkhong chu Hou-In dan sungnung Mun Theng Pen cherub lhaving teni noiya chun akoi tauvin ahi.
8 Cherub chun thingkhong chunga chu alhaving teni ajallin ahile, thingkhong le akiputna moljol teni ding chun abuh khu-in apang jengin ahi.
9 Hiche akiputna moljol teni chu asao behseh jeh chun Mun Theng a kon'in amongval chu akimu theijin, hichu Mun Theng Pen maiya chu kikoi ahi, hinlah Hou-In pama kon'in vang akimu theipoi. Hichu tuni chanin hichelai mun'a chun aum nalaiyin ahi.
10 Pathen Thingkhong sunga chun Sinai Mol chunga Mose in anakoi songpeh teni tilou thil dang imacha aumpoi, hiche lai mun hi Israel ten Egypt gam ahin dalhah nung uva Pakai toh Israel ten kitepna anasem nau mun chu ahi.
11 Chuin thempuho chun muntheng chu adalha tauve. Thempuho chu hiche nikho kin kibolnaa panghen lang panghih jongleh abonchauvin akisutheng sohkeiyun ahi.
12 Chule Levi te lasa themho Asaph, Heman, Jeduthun, chule asopiho le achateu chu tupat ponnemin akivonun, maicham solam'a chun adingun semjang, pehkhong le selangdah atum'un ahi. Amaho chu thempuho 120 chun sumkon mutnin akithopi uvin ahi.
13 Sumkon mut ho le lasa themho chun thakhat tah in Pakai chu choi-atna le thangvahna apeuvin ahi. Sumkon, sumlheng chule suhging thei jat chom-chom toh thon Pakai chu hiti hin avah choiyun,
“Pakai chu anunnom e!
Ami lungsetna longlou chu atonsot na um jing ahi!
Hiche pettah chun meilhang lom khatnin Pakai Hou-In chu ahin lodim jengin ahi.
14 Hiche meilhang jeh chun thempu ho chun anatoh u ajom thei tapouve, ijeh inem itile Pakai loupina chun Pathen Hou-In chu alo dimset ahitai.”