6
Solomon In Pakai Avahchoi
1 Chuin Solomon chu ataovin, “O Pakai nangin muthim lhangkhal kiheh lah a kacheng'e na-na tin ahi.
2 Tun keiman tonsotna na chenna ding Hou-In loupitah khat kasahpeh tai!” ati.
3 Chuin lengpa chun Israel mipi ding ho chu avekollen hiti chun Pathen phattheina athumpeh in ahi:
4 “Vahchoiyun Pakai, Israel Pathen chu, aman kapa David kom'a akamcheng tah a akitepna chu asuh bulhit ahitai. Hijeh chun kapa jah a ana seijin,
5 'Kami Israel te Egypt gam'a kahin puidoh nikhoa pat chun, Kamin kijana ding Hou-In sahna dingin Israel phung sunga khopi dang kalhengpoi chule kami Israel te chunga vaihom dingin koima dang kalhengpoi.
6 Ahinlah tun Keiman Jerusalem hi kamin kijabolna Hou-In mun dingin kalheng in, chule kami Israel te chunga leng dingin David hi kalhengtai,'” ati.
7 Chuin Solomon chun, “Kapa, David, lungthim'a Pakai, Israel Pathen, min jabolna ding Hou-In khat sahdoh nomna aum jingin ahi.
8 Ahinlah Pakai chun kapa jah a 'Kamin jabolna ding Hou-In khat sah dinga nagel chu apha lheh e atin ahi.
9 Hijongleh nangma hi Hou-In sa ding chu nahipoi, ahinlah natahsa le na thisan'a pengdoh na chapa tah chun, Kamin kijabolna ding Hou-In chu asahdoh joh ding ahi,' ati.
10 “Chule tun Pakai chun ana kitepna chu asubulhitnin kapa khellin lengpa kahung hitai, chule Pakai kitepna bang chun Israel laltouna a katou tai. Pakai, Israel Pathen min jabolna dingin Hou-In khat ka sadoh tai.
11 Hichelai mun'a chun Pakaijin ami Israel te toh akitepna Pathen Thingkhong chu kakoi tai,” ati.
Solomon'in Lhandoh Taona Aman
12 Chuin Solomon chu Israel pumpi masang Pakai maicham masanga chun ading doh in, akhut teni ajah in atao tan ahi.
13 Tun Solomon chun sum-enga kisem thuseina mun khat adung feet 7-1/2, avai feet 7-1/2, chule asan lam feet 4-1/2 asemin Hou-In leitol lailunga chun adotan ahi. Ama thuseina mun achun adingin, chule Israel mipi masanga chn adilsun vanlam ngan akhut teni adom sangin ahi.
14 Ama ataovin,
“Vo Pakai, Israel Pathen, van le leiya nangma tobang Pathen dang aumpoi. Nangman na kitepna nanit jingin, alungthim pumpia nangma kom hinjon'a kipedoh te nalungsetna longlou chu nachan jing'e.
15 Nangman na lhachapa kapa David kom'a na kitepna nanit jinge. “Tun nangman na kamchengtah a kitepna nasem chu nangma khuttah in na subulhit tai.
16 “Chule tun, Vo Pakai, Israel Pathen, na lhacha kapa David kom'a kitepna adang nasem ho chu nitjing tan, nangman nabol bang-banga na chilhah te jong lamdih a achon uva ka dan thupeh ho kitahna neitah a ajui diu le amaho lah a khat pen-pen chu Israel laltouna a toujing ding ahi nati.'
17 Vo Pakai, Israel Pathen tuhin nalhacha, David kom'a na kitepna chu subulhit jeng tan.
18 “Ahinlah, Pathen chu leiset mihemte lah a hi chengmong ding hinam? Ijeh-inem itileh vanchung sangpen hon jong nangma hi nadol louding ahi, chutileh keiman kasah Hou-In hi iti neova neo ding hitam!
19 Chuti chu hijongleh, ka taona leh ka thumna hi eina ngaipeh teiyin.
20 Asun ajanin hiche Hou-In a namin kijabolna dinga na seina mun hi nahin vetjing theiya, chule na lhachate le nami ten hiche mun lam nga a taona ahin man tengule hin ngaijin.
21 Keima le nami Israel ten kineosah tah le ngaicha tah a hiche lang mun ngatna kahin ngeh tengule neihin ngaipeh theina dingun, na chenna mun van'a kon'in hin ngaiyin lang najah tengleh hin ngaidam in.
22 “Koiham khatnin aheng akom chunga suhkhel neija themmo akichan teng kathemo e tia akihahselna dinga hiche Hou-In maicham masanga ahung tengule,
23 vanna kon'in hin ngai inlang, thu hin tanpeh jengin athemmopa chu achan dinga lom chansah inlang, mona neiloupa chu lhadoh jengin.
24 “Nami Israel te chun nangma douna a achonset jeh uva, gal alel uva achonset nauva konna ahung kiheikit uva; chule nangma angsunga ahung kineosah uva, nangma nahin koukit uva ahungtao kit ule,
25 van'a kon'in hin ngaiyin lang, nami Israel te chonsetna chu hin ngaidam in, chule amaho le apu apateu napehsa gam chu lepeh kit tan.
26 “Na mite chu nangma douna a achonset jeh uva vankot akikha a gotwi ajuh louva chule achonset jeh uva na bolgim tengleh, iham tia achonset nauva konna ahung kinung heikit uva nangma min pan’a hiche Hou-In lam ngatna ahung tao tengule,
27 vanna kon'in hin ngaiyin lang na lhachate nami Israel te chonsetna chu ngaidam in, lamdih ajot theina diuvin hil inlang, chule nangman na mite chan dinga napehsa gam'a chun gotwi chu juhsah kittan.
28 “Iham tia gamsunga kel alhah a pul alanna, muchi-chivo ho chunga natna achuh a, na mite chu gal miten gamsunga ahin delkhum uva akhopi hou ahin umkimvel uva amat got uva chule itobang vangsetna le natpi umjongleh,
29 nami Israel te chun hitobang genthei hahsatna chunga hi akhut ajah uva, Hou-In lang ngatna ahung tao ule,
30 van na umna a kon'in hin ngaiyin lang ngaidam in, na mite chu athilbol aum chan toh kilomin bolpeh in, ajeh chu nang bouseh in mihem khat cheh lungsung hi nahet ahi.
31 Chutileh nangman apu apateu na-na pehsa gamsunga achen laiseuva, nangma hi nagin jing diu nangma lampi chu ajot jing diu ahi.
32 “Khonung tengleh gampam miho nami Israel hilou ho chun, nangma hina chu ahin jahdoh uva nagin diu ahi. Ama ho chun na loupina, na thahatna le naban thahat thilbol theina ho chu ahin jahdoh uva, gamla tah gamho a konna hung diu ahi. Chutengleh amaho chun hiche Hou-In lang ngatna ahungtao tengule,
33 van'a na umna mun a kon'in ataonau hin ngaipeh inlang, athil thum uchu hin sanpeh tan; hitia chu nami Israel te banga chu leiset mihem te jousen nangma hi nahin hetdoh diu ahi. Amaho jong chun hiche Hou-In hi nangma min kijabolna dinga kisadoh ahi chu ahin hetdoh diu ahi.
34 “Na mite chu galsat dinga na soldoh nauva konna chu nangman na deilhen khopi lam ngatna, chule nangma min kijabolna dinga kasadoh Hou-In lam ngatna ahung tao teng ule,
35 van'a kon'in hin ngaipeh inlang, athum pen uchu hin kithopi tan.
36 Iti ham'a nang douna a achonset khah ule—koi achonse khalou um'am? —nangman amaho chunga na lunghan a chutengleh amaho chu agal miten jou uvin tin, gampam mi anai hijongleh agamla hijongleh sohchangin kaimang tauhen.
37 Ahinlah chuche asoh channau gam achun kisih tah in hung kinung hei kit uhenlang, tao uhenlang eiho ichonse tauve, thilse ibol tauve atiuva,
38 asoh channau gam'a chu alungthim pumpiu le alhagao pumpiuva ahung kinung heikit uva, apu apateu na-na pehsa gam lam ngatna chule nangman na lhentum khopi lam ahin ngat uva, namin jabolna' kisadoh Hou-In lam nga a ahung tao tengule,
39 van na umna munna kon'in ataonau le athumnau hin ngaipeh inlang, athum lona pen bang uchun hin panpi tan.
40 “O ka Pathen, hiche lai munna konna taona hung kimang jouse hi hin venlang, na nakol hin sung temin.
41 “Chule Vo Pakai Pathen, hung kithoudoh inlang na kicholna ding
mun na thahatni mel thingkhonga hin hunglut temin.
Vo Pakai Pathen, na thempuho chun sochatna ponsil kisil uhen;
thudih a chon na chate chu nangma phatna jallin kipah thanom uhen.
42 Vo Pakai Pathen, thao nanusa Lengpa chu nodoh dan.
Na lhacha David long louva na lungsetna chu hin geldoh jing jengin.