7
Hou-In Lhandohna
1 Solomon in ataona ahin chai-chai chun, van'a kon'in meikong ahung kikho lhan pumgo thilto ho leh kilhaina ho chu akavam sohkeiyin, chuin Pakai loupina chun Hou-In sung chu alodim soh jengin ahi.
2 Pakai loupinan Hou-In sung alodim tah jeh chun, thempu ho chu Hou-In sunga chun alut thei tapouvin ahi.
3 Israel mipi ho chun meikong ahung kikholhah a Hou-In sung alo dimset chu amu phat un, Pakai chu ahou un avahchoi tauvin,
Pakai hi aphai!
Ami lungsetna long lou chun atonsotnin aum jinge!” atiuvin ahi.
4 Chuin Lengpa le mipi ho chun, Pakai dingin kilhaina thilto abol uvin ahi.
5 Lengpa Solomon chun kilhaina a man dingin, bong 22,000 le kelngoi le kelcha 120,000 atohdoh in ahi. Chuin Lengpa le mipi ho chun Pathen Hou-In chu atohdoh tauvin ahi.
6 Thempu ho chun akinganse nau panmun cheh chu alo uvin, chule chutobang ma chun Levi te chun, “Ami lungsetna long louvin atonsotnin aum jinge!” tin lan asauve. Amaho chun Lengpa David in Pakai vahchoina dinga anasem la chu tumging tothon asauvin ahi. Israel mipiho adin sungu chun Levi te maidon tah a chun thempu hon sumkon amut uvin ahi.
7 Chuin Solomon chun Pakai Hou-In leitol lailung tah chu athenson ahi. Pumgo thilto le sathao chamna thilto ho chu hilai mun achun alhandoh in ahi; ijeh-inem itileh sum-eng maicham chun pumgo thilto ho, lhosoh thilto, chule sathao thilto chu adollou ahitai.
8 Solomon le Israel mipi chun nisagi sungin Lhambuh Kut amangun ahi. Agamla penna sei dingin sahlam'a Lebo-hamath chule lhanglam'a Egypt gamgi chan gei mi atam a tam akikhomdoh un ahi.
9 Ama hon maicham mun todohna din nisagi amangun, Lhambuh Kut bolnan nisagi ma amangun ahi. Chuin aniget lhin nin akhum khana kin abollun ahi.
10 Kinbol kichai chun Solomon in miho chu ama-ama in cheh a asol tan ahi. Amaho chu akipah thanom thei lheh jeng uve. Ijeh-inem itileh Pakai chu David le Solomon chule ami Israel te dingin ana phajing jengin ahi.
Pakaijin Solomon Adonbutna
11 Chuti chun Solomon chun Pakai Hou-In le leng inpi asah jong chu ajousoh tai, chule atohgon bang chun Hou-In le leng inpi sahna dinga thil jouse chu achai tan ahi.
12 Chuin jankhat chu Pakai, Solomon henga ahung kilah in,
“Na taona kasanpeh in, chule hiche Hou-In hi kilhaina ho lhandohna mun dingin kalheng tai.
13 Itiham khatna vankot kakha a gotwi ajuhlou ham, khaokho ho thu kapeh a na lhosoh gau chunga achuh ham, natna hise pul nalah uva kalansah ham tengleh,
14 hichea chu kamite kaminna kikousate chu ahung kineosah-uva agitlou nau lampi hoa konna ahung kinung heikit uva, kamai ahin hol uva ahung tao tengule; keiman vanna konna ataonau ka ngaipeh a achonset gitlou nau ka ngaidam'a chule agam'u ka kiledoh sah kit ding ahi.
15 Hiche Hou-In mun a konna taona kimang jouse kahin vetna, kanakol kahin sun ding ahi.
16 Ijeh-inem itihleh hiche lai mun hi atumbeh a atheng dinga ka lhendoh ahitan— hiche lai mun hi a-itih a kamin kijabolna hijing ding ahitai. Keiman hiche lai mun hi phatseh a kavet tup jing ding ahi. Ajeh chu hiche lai mun hi kalungthim in angailut pen chu ahi.
17 “Nangma jengin jong napa David banga ka thupeh, ka chondan ho, le dan ho jouse hi kitahna neitah a najui leh,
18 nangma phunggui a laltouna ka tundoh ding ahi. Hiche na dinga chu keiman napa David toh kitepna kana sem'a chu hiti hi ahi, 'Nangma chilhah ho lah a khatpen hin Israel chunga vai ahop jing ding ahi.'
19 “Ahinlah ihamtia na chihlhah ten einungsun uva, chule nangma kapeh chonna dan ho leh kapeh thu ho hi angailou uva nangma jengin jong Pathen dang ho najen lea nahou leh,
20 Keiman hiche mite chu amaho kana pehsa hiche gam’a konna chu abul, abala kabodoh ding ahi. Chuleh hiche Hou-In kamin jabolna ding leh atheng dinga kisa jong hi kapaidoh ding chule namdang miho lah a hiche lai mun hi nuisat le japi limbep bou kaso ding ahi.
21 Chule tuhin hiche Hou-In hi akijabol lheh nai. Ahinlah hiche teng chuleh ahin jotpa hon adatmo diu amaho chu kidongto uva 'Ipi jeh a Pakaijin hitobang loma thil melse hi hiche gam le Hou-In chunga hi abol jeng ahitadem?' ati diu ahi.
22 “Chutengleh adonbutna chu, 'Amiten adalhah Pakai, apu apa teu Pathen, Egypt gam'a konna ahin puidoh pau chu anungsun uva, ama khella chu pathen dang ahou uva amasanga abohkhup jeh uva, Pathen'in hitobang vangsetna ho hi achung uva alhunsah ahitai' ati dingu ahi,” ati.