104
Hahii ita nia Kriador
1 Hau hatete ba hau nia aan, hahii NAI Maromak ba.
NAI hau nia Maromak, Ita mak boot teb-tebes;
Ita Boot hatudu sai Ita nia naran boot ho naroman nabilan.
2 Ita Boot falun Aan ho naroman hanesan fali hena naruk;
Ita Boot haluan lalehan hanesan ema dada tenda.
3 Ita Boot harii Ita Boot nia hela fatin iha kalohan mahar nia leten;
Ita Boot halo kalohan sai Ita Boot nia kuda kareta;
Ita Boot sae anin nia liras hanesan ema sae kuda.
4 Ita Boot haruka anin lori Ita Boot nia lia menon,
no halo ahi lakan sai Ita Boot nia atan.
5 Ita Boot hatuur mundu ba iha nia fatin;
mundu nunka atu sees husi nia fatin nee.
6 Ita Boot falun mundu ho bee naruk hanesan hena naruk;
bee nee taka tomak foho aas sira.
7 Depois Ita Boot siak halo bee halai tiha;
Ita Boot nia lian tarutu halo bee suli sees tiha.
8 Bee suli liu husi foho tuun ba iha rai klean,
too iha fatin nebee Ita Boot hatudu ona.
9 Ita Boot tau baliza atu bee la bele suli liu;
bee sei la taka mundu tan.
10 Ita Boot halo bee matan suli ba mota kiik;
bee nee suli tuun liu husi foho nia leet.
11 Nunee animal fuik bo-boot sira bele hemu;
kuda buru fuik hemu too hamrook lakon.
12 Manu fuik halo nia knuuk besik bee nee;
manu sira nee hananu iha ai sanak leten.
13 Husi Ita Boot nia uma iha leten, Ita Boot hatuun udan been ba foho;
Ita Boot nia liman fatin halo rai nee bosu.
14 Ita Boot halo duut buras ba animal,
no halo ai horis atu ema bele uza.
Nunee rai bele produs ai haan,
15 tua hodi halo ema nia laran kontenti,
mina hodi halo ema nia oin nabilan,
no hahaan hodi halo sira forti.
16 Ai huun sedru rai Líbanu nian hetan bee diak;
ai huun nee NAI Maromak nian, Nia mak kuda.
17 Iha nebaa manu fuik halo sira nia knuuk;
manu fuik boot halo nia uma iha ai sentru nia sanak.
18 Foho aas sai bibi fuik sira nia hela fatin;
fatuk kuak sai laku nia subar fatin.
19 Ita Boot halo fulan hodi marka tempu;
loro matan hatene bainhira mak atu tuun.
20 Ita Boot foo nakukun, halo rai kalan tiha,
nunee animal ai laran nian sai mai.
21 Liaun forti lian boot hodi kasa animal,
atu buka ai haan nebee Maromak prepara.
22 Bainhira loro matan sae, liaun sira nee fila fali
hodi latan aan iha sira nia hela fatin.
23 Depois ema lao sai baa halao sira nia servisu;
sira halo sira nia knaar too kalan.
24 NAI Maromak, Ita Boot nia liman fatin barak teb-tebes!
Ita Boot halo buat sira nee hotu ho matenek;
mundu nee nakonu ho buat nebee Ita Boot halo.
25 Haree ba, iha tasi boot teb-tebes, luan teb-tebes;
iha tasi laran iha buat moris kiik no boot,
barak loos, sura la bele.
26 Iha nebaa roo lao baa lao mai;
iha mos samea boot Leviatán, Ita Boot forma nia atu halimar iha tasi laran.
27 Kriatura hotu-hotu laran metin ba Ita Boot
atu foo ai haan ba sira tuir nia tempu.
28 Bainhira Ita Boot foo ba sira,
sira foti tiha;
bainhira Ita Boot loke liman,
sira bosu ho hahaan mesak diak nian.
29 Bainhira Ita Boot subar Ita Boot nia oin,
sira fuan lakon tiha;
bainhira Ita Boot hasai tiha sira nia iis,
sira mate hodi fila fali ba rai rahun.
30 Bainhira Ita Boot foo Ita Boot nia iis
mak kriatura sira hetan moris;
Ita Boot hafoun mundu rai klaran.
31 Maromak nia naroman nabilan sei dura nafatin ba nafatin;
hau hein atu NAI haksolok ho buat nebee Nia kria tiha ona.
32 Bainhira Nia hateke ba mundu, rai nakdedar;
Nia liman kaer kona foho, foho suar sae.
33 Iha hau nia moris tomak hau sei hananu ba NAI;
durante hau sei iha iis, hau sei hananu hahii hau nia Maromak.
34 Hau hein katak hau nia liafuan hirak nee bele halo kontenti Nia laran;
hau haksolok tanba NAI Maromak.
35 Hau harohan atu sala nain sira bele lakon husi mundu,
no ema aat la iha tan.
Hau hatete ba hau nia aan, hahii NAI Maromak ba.
Hahii NAI Maromak!