103
Nai Maromak nia domin
Salmu David nian.
1 Hau hatete ba hau nia aan, hahii NAI Maromak ba;
ho laran tomak, hahii Nia naran santu ba.
2 Hau hatete ba hau nia aan, hahii NAI Maromak ba;
keta haluha Nia laran diak.
3 Tanba Nia foo perdaun ba o nia sala hotu,
no kura o nia moras hotu-hotu.
4 Nia hasai o husi rai kuak laran
hodi foo domin rohan-laek no laran luak ba o.
5 Nia foo buat diak ba o tuir o nia hakarak,
atu nunee Nia halo o joven fila fali hanesan manu makikit.
6 NAI Maromak sempre halo buat nebee loos
hodi foo justisa ba vitima sira nebee ema hanehan.
7 Nia foo hatene Nia dalan ba Moisés;
Nia hatudu Nia hahalok ba ema Israel.
8 NAI Maromak nee laran diak no laran luak;
Nia Pasiensia Nain, no nakonu ho domin rohan-laek.
9 Nia bele foo sala mai ita maibee laos beibeik;
Nia bele hirus ita maibee la rai hirus nafatin ba nafatin.
10 Nia bele kastigu ita maibee kastigu nia todan la too buat nebee ita merese simu;
Nia foo kastigu ita laos tuir buat aat hotu nebee ita halo tiha ona.
11 Tanba hanesan lalehan aas liu mundu,
nunee mos Maromak nia domin aas teb-tebes ba ema nebee mak hamtauk Nia.
12 Hanesan lorosae dook husi loromonu,
nunee mos Nia hadook ita nia sala husi ita.
13 Nudar aman hadomi nia oan sira,
nunee mos NAI Maromak hadomi ema nebee mak hamtauk Nia.
14 Tanba Nia hatene ita nee halo husi saida;
Nia la haluha katak ita nee rai rahun.
15 Ita ema nia moris hanesan duut;
ita buras hanesan ai funan iha rai fuik.
16 Bainhira anin huu, semo lakon tiha;
ema atu buka tuir nia fatin, la hetan ona.
17 Maibee husi huun too rohan
NAI Maromak hadomi ema nebee mak hamtauk Nia,
no Nia laran diak hamutuk ho sira nia oan bei-oan sira,
18 ho ema nebee kaer metin Nia promesa,
no la haluha halo tuir Nia lei.
19 NAI Maromak harii tiha ona Nia kadeira ukun iha lalehan;
Nia mak Liurai hodi ukun buat hotu-hotu.
20 Imi anju sira, hahii NAI ba.
Imi nee iha forsa boot hodi halao Nia orden;
imi halo tuir Nia liafuan.
21 Tropas lalehan nian, hahii NAI ba.
Imi nee Nia atan hodi halo tuir Nia hakarak.
22 Buat hotu nebee Nia halo,
iha nebee-nebee deit mak Nia ukun, hahii NAI ba.
Hau hatete ba hau nia aan, hahii NAI Maromak ba.