102
Orasaun iha susar laran
Ema kbiit-laek ida nia orasaun, bainhira nia fraku, nunee nia fakar sai nia susar ba NAI Maromak.
1 NAI Maromak, rona hau nia orasaun;
simu hau nia halerik ba.
2 Keta subar Ita Boot nia oin mai hau
bainhira hau iha susar laran.
See Ita Boot nia tilun mai hau;
bainhira hau harohan, hataan hau ho lalais ba.
3 Tanba hau nia moris liu lalais deit hanesan ahi suar;
hau nia isin tomak manas hanesan ahi klaak.
4 Hau nia fuan namlaik tiha hanesan duut nebee ema baku ba rai;
hau la hanoin tan atu haan.
5 Iha terus laran hau halerik makaas;
hau sai krekas, kulit taka ruin.
6 Hau hanesan manu kakuuk iha rai fuik,
hanesan manu kakuuk iha uma dodok nia laran.
7 Hau toba la dukur,
hau hanesan manu fuik nebee mes-mesak loos iha uma kakuluk leten.
8 Loron tomak hau nia inimigu sira hatete aat hau;
sira nebee koalia hasoru hau temi hau nia naran hodi foo malisan mai hau.
9 Hau nia hahaan mak ahu kdesan;
hau hemu fali hau nia matan been.
10 Tanba Ita Boot hirus teb-tebes hau;
Ita Boot foti hau hodi soe tiha ona hau.
11 Hau nia moris hanesan lalatak nebee mohu bainhira loro matan monu;
hau namlaik hanesan tiha duut.
12 Maibee NAI Maromak, Ita Boot ukun tinan ba tinan;
Ita Boot nia naran dura husi jerasaun ba jerasaun.
13 Ita Boot sei hamriik hodi hatudu Ita Boot nia domin ba sidade Siaun,
tanba tempu ona atu Ita Boot hatudu Ita Boot nia diak ba sidade nee;
tempu nebee Ita Boot marka nee too tiha ona.
14 Tanba Ita Boot nia atan sira hadomi sidade nee nia fatuk;
too rai rahun nebee iha dalan mos, sira hanoin teb-tebes.
15 Nasaun hotu-hotu sei hamtauk NAI nia naran;
liurai sira iha mundu sei tauk Ita Boot nia kbiit.
16 Tanba NAI Maromak sei harii fila fali Siaun
hodi hatudu sai Nia kbiit boot.
17 Nia sei hataan ema kiak rabat rai sira nia orasaun;
Nia sei la fila kotuk ba sira nia hamulak.
18 Hakerek ida nee ba jerasaun tuir mai,
atu ema nebee seidauk moris bele hahii NAI Maromak.
19 NAI iha Nia fatin santu iha leten aas ba hateke tuun;
husi lalehan Nia haree mai mundu
20 hodi rona ema dadur sira nia halerik,
no hasai sira nebee hetan kastigu mate.
21-22 Nunee liurai sira ho povu sira sei halibur hamutuk
hodi adora NAI Maromak.
Sira sei hahii NAI Maromak iha Jerusalém;
sira sei foo sai Nia naran iha Siaun.
23 Hau nia moris foin too iha klaran, Maromak halo hau nia isin nebee forti sai fraku tiha;
Nia habadak hau nia vida.
24 Nunee hau dehan,
“Hau nia Maromak, Ita Boot moris tinan ba tinan;
hau foin too iha dalan klaran, keta hasai hau nia iis.”
25 Hori uluk liu Ita Boot halo mundu nee;
lalehan nee Ita Boot nia liman fatin.
26 Buat sira nee hotu aban-bainrua sei lakon, maibee Ita Boot iha nafatin;
buat sira nee sei sai bosan hanesan faru tuan.
Ita Boot sei troka buat sira nee hanesan troka hena,
no sei la iha tan.
27 Maibee Ita Boot nunka muda;
Ita Boot nia moris sei la remata.
28 Ita Boot nia atan sira nia oan sei moris ho hakmatek;
sira nia jerasaun sei dura iha Ita Boot nia oin.