106
Nai Maromak nia diak ba Nia povu
1 Hahii NAI Maromak!
Foo agradese ba NAI Maromak, tanba Nia nee diak;
Nia domin dura tinan ba tinan.
2 See mak bele foo sai buat boot nebee NAI halo?
See mak bele hahii lo-loos Nia?
3 Ema nebee mak kaer metin justisa,
ema nebee sempre halo buat nebee loos,
sira nee hetan ksolok.
4 NAI Maromak, bainhira Ita Boot hatudu laran luak ba Ita Boot nia povu, keta haluha hau;
bainhira Ita Boot salva povu nee, tulun hotu hau ba,
5 atu hau bele moris diak hamutuk ho ema sira nebee Ita Boot hili tiha ona,
atu hau bele haksolok ho Ita Boot nia povu,
atu hau bele tane aas Ita Boot hamutuk ho Ita Boot nia ema rasik.
6 Ami halo tiha ona sala, hanesan mos ami nia bei-ala sira;
ami halo tiha ona pekadu, ami nia hahalok aat.
7 Uluk bainhira ami nia bei-ala sira iha rai Ejitu,
sira la foo folin ba milagre nebee Ita Boot halo;
sira la hanoin tan domin rohan-laek nebee Ita Boot hatudu fila-fila ba sira;
sira kontra Maromak Aas Liu iha Tasi Mean.
8 Maski nunee Maromak salva sira,
atu ema bele foti aas Nia naran,
atu Nia bele hatudu sai Nia kbiit boot.
9 Nia siak Tasi Mean, tasi maran kedas;
Nia lori sira liu husi tasi klaran hanesan fali liu iha rai fuik maran.
10 Nia salva sira husi funu baluk sira nia liman;
Nia liberta sira husi inimigu sira nia liman laran.
11 Bee halo mout tiha ema nebee kontra sira;
ema sira nee la iha ida mak moris.
12 Depois bei-ala sira fiar ba Nia promesa,
no hananu hahii Nia.
13 Maibee lalais deit sira haluha fali buat nebee Maromak halo tiha ona;
sira lakohi hein tan Nia lia menon.
14 Iha rai fuik, sira kaan teb-tebes atu haan hahaan diak nian;
iha rai fuik maran sira koko Maromak.
15 Nunee Nia foo ba sira buat nebee sira husu,
maibee Nia mos haruka moras aat ba iha sira nia leet.
16 Iha sira nia akampamentu, sira laran moras ba Moisés ho Arão,
Arão nee NAI Maromak mak hili sai nai lulik.
17 Nunee rai nakloke aan hodi tolan tiha Datan;
rai taka hakoi tiha Abiram ho nia grupu.
18 Ahi lakan sae iha sira nia klaran
hodi haan mutuk tiha ema aat sira nee.
19 Iha foho Horeb ami nia bei-ala sira halo estatua karau oan;
sira adora fali estatua nebee fui husi osan mean.
20 Maromak ida nebee kbiit boot sira husik tiha;
sira troka fali ho estatua karau aman, animal nebee haan duut deit.
21 Sira haluha tiha Maromak, sira nia Salvador;
Maromak nee mak halo buat boot iha rai Ejitu,
22 Nia halo milagre iha ema Ham nia rain,
no halo buat nebee makaas iha Tasi Mean.
23 Nee mak Nia dehan, Nia hakarak halo mohu tiha sira.
Maibee Moisés, ema ida nebee Nia hili tiha ona hamriik iha klaran
hodi tahan netik Nia hirus ba sira.
Nunee Maromak la konsege halo mohu sira.
24 Depois bei-ala sira nee lakohi simu rai nebee furak nee;
sira la fiar ba Nia promesa.
25 Sira murmura iha sira nia tenda laran,
no lakohi rona NAI Maromak.
26 Nunee Nia foti Nia liman hodi jura katak,
Nia sei hamate tiha sira iha rai fuik maran.
27 Nia sei halo sira nia jerasaun namkari iha nasaun sel-seluk;
sira sei lao lemo rai iha rai sel-seluk.
28 Sira entrega aan ba estatua Baal iha foho Peor
hodi haan fali naan sakrifisiu nebee ema foo ba matebian sira.
29 Sira nia hahalok nee halo Maromak hirus,
nunee moras aat mosu iha sira nia klaran.
30 Maibee Fineias hamriik hodi tahan netik,
nee mak moras aat nee para tiha.
31 Buat nebee Fineias halo nee, buat diak ida,
no ema sei la haluha husi jerasaun ba jerasaun.
32 Iha bee Meriba nian, bei-ala sira halo NAI Maromak hirus;
Moisés hetan terus tanba sira nia hahalok aat nee,
33 tanba sira kontra Maromak nia Espiritu,
nunee Moisés la hatene tuir liafuan nebee sai husi nia ibun laran.
34 Sira lakohi halo mohu nasaun jentiu sira
nebee NAI Maromak haruka sira halo mohu,
35 maibee sira ba ranxu fali nasaun sira nee
hodi halo tuir fali sira nia lisan.
36 Sira adora fali ema jentiu sira nia estatua;
ida nee lori sira ba rai kuak.
37 Sira oho sira nia oan mane ho oan feto
nudar sakrifisiu ba maromak falsu.
38 Sira oho ema nebee la sala;
sira fakar sira nia oan feto ho oan mane nia raan
hodi foo ba ema Kanaán nia maromak falsu nudar sakrifisiu.
Nunee raan nebee fakar nee halo rai nee sai foer tiha.
39 Sira hafoer sira nia aan ho buat nebee sira halo;
sira nia hahalok nee hanesan feto kaben nain nebee halai tuir fali mane seluk.
40 Tanba nee NAI Maromak nia laran nakali ba Nia povu;
Nia hakribi fali povu nebee Nia hili nudar Nia riku-soin.
41 Nia entrega sira ba iha nasaun jentiu sira nia liman laran,
atu sira nia funu baluk mak ukun fali sira.
42 Sira nia inimigu hanehan sira
hodi ukun sira ho kroat.
43 Dala barak Maromak salva sira,
maibee sira fila kontra fali Nia,
nunee sira mout dadauk ba iha sira nia sala.
44 Maski nunee Nia rona sira nia halerik;
Nia foo atensaun ba sira iha susar laran.
45 Nia hanoin nafatin Nia promesa ba sira;
Nia la kastigu sira, tanba Nia domin boot teb-tebes.
46 Inimigu sira hotu nebee dadur tiha Nia povu,
Nia halo sira nia laran hanoin fali dadur sira nee.
47 NAI ami nia Maromak, salva ami ba;
halibur fali ami husi nasaun sel-seluk,
atu ami bele foo agradese ba Ita Boot nia naran santu,
no haksolok hahii Ita Boot.
48 Hahii NAI, Israel nia Maromak,
nafatin ba nafatin.
Ema hotu-hotu dehan, “Amen!”
Hahii NAI Maromak!