107
Agradese ba Nai Maromak tanba Nia domin rohan-laek
1 Foo agradese ba NAI Maromak tanba Nia nee diak;
Nia domin dura tinan ba tinan.
2 Imi sira nebee NAI salva ona, konta imi nia istoria ba;
Nia hasai tiha ona imi husi funu baluk sira nia liman laran;
3 Nia halibur imi fila fali husi nasaun sel-seluk,
husi lorosae-loromonu, husi tasi feto tasi mane.
4 Iha ema balu lao lemo-lemo tiha iha rai fuik maran,
la hetan dalan ba sidade ida atu hela.
5 Sira hamlaha-hamrook;
sira lakon esperansa ona.
6 Iha susar laran, sira halerik ba NAI Maromak;
Nia salva tiha sira husi susar nee.
7 Nia lori sira tuir dalan loos
too iha sidade ida nebee sira bele hela.
8 Sira tenki foo agradese ba NAI tanba Nia domin rohan-laek;
agradese ba buat furak nebee mak Nia halo ba ita ema.
9 Tanba sira nebee hamrook, Nia foo hemu too hamrook lakon;
sira nebee hamlaha, Nia foo ai haan diak nian ba sira too bosu.
10 Iha ema balu dadur tiha, sira tuur hela iha fatin nebee nakukun teb-tebes;
korenti besi halo sira terus,
11 tanba sira kontra tiha ona Maromak nia liafuan,
no lakohi simu Maromak Aas Liu nia lia menon.
12 Nunee Nia hatodan sira ho servisu too kosar metan suli;
sira atu monu sal-sala no la iha ema ida mak tulun.
13 Iha susar laran, sira halerik ba NAI Maromak;
Nia salva sira husi susar nee.
14 Nia lori sira sai husi fatin nakukun liu,
no hakotu tiha korenti nebee kesi sira.
15 Sira tenki foo agradese ba NAI tanba Nia domin rohan-laek;
agradese ba buat furak nebee mak Nia halo ba ita ema.
16 Tanba Nia sobu aat tiha portaun boot nebee halo husi riti;
Nia taa kotu tiha besi nebee satan portaun.
17 Iha ema balu hetan moras tanba sira nia hahalok aat;
sira hetan terus tanba sira nia pekadu rasik.
18 Sira baruk ho hahaan hotu-hotu;
sira besik too ona iha odamatan mate nian.
19 Iha susar laran, sira halerik ba NAI Maromak;
Nia salva sira husi susar nee.
20 Nia lia tuun mak sira hetan kura;
Nia salva sira husi rai kuak.
21 Sira tenki foo agradese ba NAI tanba Nia domin rohan-laek;
agradese ba buat furak nebee mak Nia halo ba ita ema.
22 Sira tenki foo oferta agradesimentu nian,
no kanta ho haksolok hodi foo sai buat nebee Nia halo.
23 Iha ema balu sae roo hodi lao iha tasi laran;
sira hakur tasi boot hodi halo kontratu.
24 Sira haree buat nebee mak NAI Maromak halo,
buat furak nebee Nia halo iha tasi klean.
25 Nia lia tuun, anin boot sai mai
hodi hiit sae laloran.
26 Laloran hirak nee sae too lalehan, tuun too rai klean;
marineiru sira iha perigu laran, sira tauk teb-tebes.
27 Sira oin halai no lao rungu-ranga hanesan ema lanu;
sira nia neon lakon tiha.
28 Iha susar laran, sira halerik ba NAI Maromak;
Nia hasai sira husi susar nee.
29 Nia hapara anin boot,
no halo laloran hakmatek.
30 Sira hotu kontenti tanba buat sira nee sai kalma fali;
Nia lori sira ba rai nebee mak sira atu baa.
31 Sira tenki foo agradese ba NAI tanba Nia domin rohan-laek;
agradese ba buat furak nebee mak Nia halo ba ita ema.
32 Sira tenki foti aas Nia naran iha ema lubuk boot nia klaran,
no hahii Nia iha nai ulun sira nia leet.
33 Maromak halo mota sai tiha rai fuik maran;
Nia halo bee matan sai fali rai maran dekor.
34 Rai nebee bokur sai tiha rai masin,
tanba ema nebee hela iha fatin nee, sira nia hahalok aat.
35 Nia halo rai fuik maran nakfilak ba bee lihun;
rai maran dekor, Nia halo sai fali bee matan.
36 Ema sira nebee hamlaha, Nia lori sira baa moris iha nebaa;
sira mos harii sidade iha nebaa atu bele hela.
37 Sira kari fini iha toos no kuda uvas;
sira hetan rezultadu barak.
38 Nia foo bensaun ba sira, nunee sira aumenta barak;
sira nia animal mos la menus.
39 Depois ema hanehan sira no halo sira susar ho tristi
hodi hatuun sira no halo sira balu mate.
40 Maromak hamoe fali nai ulun hanehan door sira
hodi halo sira lao lemo rai iha rai fuik nebee la iha dalan.
41 Maibee Nia foti sae ema kiak sira husi susar laran,
no halo sira nia familia aumenta barak hanesan bibi.
42 Ema moris loos haree hodi haksolok,
maibee ema aat hotu-hotu taka sira nia ibun.
43 Ema nebee iha matenek sei foo atensaun ba buat sira nee
hodi medita NAI Maromak nia domin rohan-laek.