108
Orasaun husu tulun tanba inimigu ataka
Salmu David nian.
1 Maromak, hau laran metin ba Ita Boot;
ho hau nia laran tomak, hau sei toka muzika hodi hananu hahii Ita Boot.
Hau hatete ba hau nia aan, hadeer ba!
2 Viola ho viola tali sanulu, hadeer ba!
Hau sei fanu loro matan.
3 NAI Maromak, hau sei foo agradese ba Ita Boot iha nasaun hotu-hotu nia klaran;
hau sei hananu hahii Ita Boot iha povu sira nia leet.
4 Tanba Ita Boot nia domin aas liu lalehan;
Ita Boot nia lia loos firmi too iha kalohan.
5 Maromak, hatudu Ita Boot nia Aan aas liu lalehan;
halo Ita Boot nia kbiit domina mundu tomak.
6 Hodi Ita Boot nia liman loos salva ami no tulun ami ba,
atu nunee ema nebee Ita Boot hadomi bele hetan salvasaun.
7 Maromak lia tuun husi Nia hela fatin dehan,
“Hau sei manaan!
Hau sei sukat rai Sikem hodi foo ba Hau nia povu;
Hau sei fahe rai Sukot ba sira.
8 Rai Gileade Hau nian,
rai Manassés mos Hau nian;
ema Efraim Hau nia kapaseti,
ema Judá Hau nia rota liurai.
9 Rai Moab Hau nia basia hodi fase liman;
rai Edom fatin para soe Hau nia sandalias ba;
Hau haksolok haklalak tanba Hau manaan rai Filístia.”
10 Maromak, see loos mak atu lori hau ba iha sidade nebee forti?
See loos mak atu lori hau ba iha rai Edom?
11 Maromak, Ita Boot soe duni ami ka?
Maromak, Ita Boot lakohi avansa ho ami nia militar sira ka?
12 Tulun ami hodi kontra inimigu sira,
tanba ema kriatura nia ajuda la iha folin.
13 Hamutuk ho Maromak ita sei manaan;
Nia sei sama ita nia inimigu sira.