109
Ema laran moras halerik ba Nai Maromak
Salmu David nian, ba dirijenti koru.
1 Hau nia Maromak, hau hahii Ita Boot;
keta nonook deit,
2 tanba ema aat ho ema lohi door loke sira nia ibun hodi kontra hau;
sira nia ibun koalia lia bosok hasoru hau.
3 Sira haleu hau hodi foo sai liafuan odi;
sira ataka hau maski hau la sala.
4 Hau hadomi sira no halo orasaun ba sira,
maibee sira duun fali hau.
5 Hau nia hahalok diak, sira selu fali ho aat;
hau hadomi sira maibee sira odi fali hau.
6 Foti ema aat ruma hodi kontra hau nia inimigu;
haruka ema ida hamriik iha nia liman loos hodi foo sala ba nia.
7 Bainhira juis tesi nia lia, hau husu atu juis hatuun desizaun katak nia sala duni;
konsidera nia orasaun mos hanesan pekadu ida.
8 Habadak tiha nia vida ba;
husik ema seluk hadau tiha nia kargu.
9 Husik nia oan sira sai oan kiak,
no nia feen sai faluk tiha.
10 Husik nia oan sira lao lemo rai hodi tane liman ba ema seluk;
husik ema duni sira sai husi sira nia uma nebee naksobu tiha ona.
11 Halo nia la bele selu fali nia tusan too osan nain foti tiha nia riku-soin hotu;
husik ema fuik mai hadau hotu tiha buat nebee nia hetan husi nia kosar been.
12 Hau husu atu la iha ema ida halo tan buat diak ba nia,
ka hanoin nia oan nebee nia husik hela.
13 Halo nia jerasaun sira lakon mohu,
nunee sira nia naran hasai tiha husi jerasaun tuir mai.
14 NAI Maromak, hanoin hetan nafatin nia bei-ala sira nia sala ba;
keta hamoos nia inan nia pekadu.
15 Husik sira nia sala hela nafatin iha NAI Maromak nia oin,
atu nia naran la temi tan iha mundu nee.
16 Tanba nia nunka hanoin atu hatudu laran diak ba ema,
maibee nia halo terus ema kiak ho kbiit-laek sira ho ema nebee lakon esperansa
hodi oho sira.
17 Nia gosta foo sai malisan ba ema;
husik malisan nee fila fali ba nia.
Nia lakohi foo bensaun ba ema;
husik bensaun mos dook tiha husi nia.
18 Malisan sai tiha hanesan fali hena nebee nia hatais loro-loron;
halo malisan tama tiha ona iha nia isin lolon hanesan bee nebee nia hemu;
halo malisan tama liu ba iha nia ruin hanesan mina nebee nia kose.
19 Halo malisan falun nia hanesan ropa nebee nia hatais,
no sempre kesi metin nia hanesan sintu.
20 NAI Maromak, hatuun kastigu hirak nee hodi selu fali ema nebee duun hau;
foo kastigu nee ba ema nebee mak hatete aat hau.
21 Maibee NAI Maromak Kbiit Nain,
tulun hau, atu ema foti aas Ita Boot nia naran;
salva hau, tanba Ita Boot nia domin nee diak teb-tebes.
22 Tanba hau kiak no kbiit-laek,
no hau nia fuan kanek too laran.
23 Uitoan tan hau lakon hanesan lalatak nebee mohu bainhira loro matan monu;
hau hanesan gafanhotu nebee anin huu lakon tiha.
24 Hau nia ain tuur nakdedar tanba jejun;
hau nia isin sai krekas, kulit taka ruin.
25 Ema nebee duun hau hamnasa fali hau;
sira haree hau, sira doko ulun.
26 NAI hau nia Maromak, tulun hau ba;
salva hau tuir Ita Boot nia domin rohan-laek.
27 Foo hatene ba sira katak Ita Boot nia liman mak halo ida nee,
NAI Maromak mak salva hau.
28 Sira bele hotar hau,
maibee Ita Boot sei foo bensaun;
husik ema nebee ataka hau hetan moe,
maibee Ita Boot nia atan hau hetan ksolok.
29 Husik ema nebee duun hau hetan naran foer
hodi falun aan ho moe hanesan fali taka hena.
30 Hau nia ibun sei agradese ba NAI Maromak;
hau sei hahii Nia iha ema lubuk boot nia klaran.
31 Tanba Maromak defende ema kbiit-laek sira
hodi salva sira husi ema nebee atu hamonu kastigu mate ba sira.