110
Nai Maromak foo kbiit ba liurai
Salmu David nian.
1 NAI Maromak hatete ona ba hau nia nai nunee:
“Mai tuur iha Hau nia sorin loos,
too Hau halo o nia inimigu sira taka rabat iha o nia ain okos.”
2 NAI Maromak sei haboot o nia kbiit nudar liurai;
o ukun husi Siaun;
too o nia inimigu sira mos o sei ukun!
3 Iha loron nebee o hamriik iha foho santu atu halo funu,
o nia tropas sira sei prontu;
o nia mane joven sira sei mai
hanesan mahobeen iha dadeer-saan.
4 NAI Maromak jura tiha ona,
no sei la muda Nia promesa dehan,
“O sai nai lulik tinan ba tinan, hanesan Melkizedek.”
5 Nai Maromak iha hela o nia sorin loos;
iha loron nebee Nia fakar sai Nia hirus,
Nia sei hamohu tiha liurai husi rai sel-seluk.
6 Nia sei hamonu kastigu ba nasaun jentiu sira
hodi halakon tiha ukun nain sira iha mundu tomak,
too mate isin bar-barak bou hamutuk.
7 Liurai sei hemu bee husi mota oan iha dalan ninin,
nunee nia sei forti fali hodi foti sae nia ulun.