116
Agradese ba Nai Maromak nia salvasaun
1 Hau hadomi NAI Maromak tanba Nia rona hau nia lian;
Nia rona hau bainhira hau husu tulun.
2 Nia see tilun mai hau,
nunee durante hau sei moris, hau sei harohan nafatin ba Nia.
3 Uluk tali mate nian bobar hela hau;
susar rate nian haleu hau;
hau tristi ho laran dodok.
4 Depois hau bolu NAI Maromak nia naran;
hau harohan, “NAI, mai salva hau ba!”
5 NAI nee laran diak no sempre halo buat nebee loos;
ita nia Maromak nee laran luak.
6 NAI foo mahon ba ema nebee mak matan tomak;
Nia salva hau bainhira hau la bele halo buat ida.
7 Hau hatete ba hau nia aan, “Hakmatek fila fali ba,
tanba NAI halo buat diak ba o.”
8 NAI, Ita Boot hasai tiha ona hau husi mate;
Ita Boot hamaran tiha hau nia matan been,
no halo hau nia ain la sidi.
9 Nunee hau lao iha NAI nia prezensa,
iha ema moris sira nia rain.
10 Uluk hau dehan, “Hau terus aat liu.”
Bele nunee mos hau konfia NAI Maromak.
11 Iha konfuzaun laran hau dehan,
“Ema hotu-hotu bosok-teen.”
12 Oinsaa mak hau bele selu fali
NAI Maromak nia diak tomak nebee Nia halo ona mai hau?
13 Hau sei hasae oferta tua hodi agradese tanba NAI salva tiha ona hau;
hau sei bolu NAI nia naran.
14 Ho nunee hau kumpri hau nia promesa ba NAI
iha Nia povu hotu nia oin.
15 NAI Maromak hanoin teb-tebes
bainhira Nia ema ida mate.
16 Tebes duni NAI, hau serbi Ita Boot;
hau nee Ita Boot nia atan, hanesan mos hau nia inan.
Ita Boot hasai tiha ona hau husi lasu.
17 Hau sei foo oferta agradesimentu nian ba Ita Boot
hodi bolu Ita Boot nia naran.
18 Hau sei kumpri hau nia promesa ba NAI
iha Nia povu hotu nia oin,
19 iha NAI nia uma oin
iha Jerusalém.
Hahii NAI Maromak!