115
NAI mesak deit mak Maromak boot
1 NAI Maromak, ami laos husu atu Ita Boot tane aas ami nia naran, nee lae!
Maibee tane aas Ita Boot nia naran,
tanba Ita Boot nia domin rohan-laek
no Ita Boot sempre kaer metin Ita Boot nia liafuan.
2 Tansaa mak nasaun jentiu sira husu fali dehan,
“Sira nia Maromak iha nebee?”
3 Ami nia Maromak iha lalehan;
Nia halo saida deit tuir Nia hakarak.
4 Maibee ema jentiu sira adora fali estatua lulik nebee ema kriatura mak halo
husi osan mean ho osan mutin.
5 Iha ibun maibee la bele koalia;
iha matan maibee la bele haree.
6 Iha tilun maibee la bele rona;
iha inus maibee la bele horon.
7 Iha liman maibee la bele senti;
iha ain maibee la bele lao;
sira la bele hasai lian husi sira nia kakorok.
8 Ema nebee kria estatua lulik sira nee, sira sai hanesan fali buat nebee sira kria nee;
ema nebee fiar ba estatua sira nee mos sei sai nunee hotu.
9 Israel oan sira, laran metin ba NAI Maromak ba;
Nia mak tulun imi no defende imi.
10 Arão nia jerasaun, laran metin ba NAI Maromak ba;
Nia mak tulun imi no defende imi.
11 Imi sira nebee hamtauk NAI Maromak, laran metin ba NAI Maromak ba;
Nia mak tulun imi no defende imi.
12 NAI hanoin ita, no sei foo bensaun ba ita;
Nia sei foo bensaun ba povu Israel;
Nia sei foo bensaun ba Arão nia jerasaun.
13 Ema kiik ka ema boot nebee hamtauk NAI,
Nia sei foo bensaun ba sira.
14 Hau harohan atu NAI Maromak halo imi sai buras,
atu imi ho imi nia oan sira aumenta barak.
15 NAI foo bensaun ba imi;
Kriador lalehan ho rai nian foo bensaun ba imi.
16 Lalehan nebaa NAI nian,
maibee mundu nee Nia foo tiha ona ba ema kriatura.
17 Laos ema mate mak hahii NAI;
laos ema nebee mak tuun tiha ona ba fatin lian-laek mak gaba Nia.
18 Maibee ita nee mak hahii adora NAI,
agora too tinan ba tinan.
Hahii NAI Maromak!