122
Orasaun ba sidade Jerusalém
Kantiku peregrinasaun husi David.
1 Hau haksolok bainhira ema dehan mai hau,
“Mai ita baa iha NAI Maromak nia uma.”
2 Jerusalém, ami nia ain hakat tama tiha ona
ba iha o nia portaun boot.
3 Jerusalém nee harii metin
nudar sidade nebee la nakdoko.
4 Suku sira iha Israel sae mai iha nee;
NAI Maromak nia povu sae mai,
atu hahii NAI nia naran
tuir mandamentu nebee Nia foo tiha ona ba Israel.
5 Iha nee liurai David nia jerasaun sira tuur iha kadeira ukun
hodi tesi povu nia lia.
6 Halo orasaun atu ema Jerusalém bele moris diak:
“Jerusalém, hau harohan atu ema nebee hadomi o, bele moris hakmatek,
7 o nia palasiu laran iha pas,
iha o nia moru laran ema bele hela hakmatek.”
8 Hau hakarak atu hau nia familia ho kolega sira bele hetan diak,
nunee hau dehan, “Imi ema Jerusalém, moris iha pas nia laran ba.”
9 Hau hakarak atu NAI ita nia Maromak nia uma bele hetan diak,
nunee hau buka atu povu Jerusalém moris diak.