124
Agradese tanba Nai Maromak foo mahon ba Nia povu
Kantiku peregrinasaun husi David.
1 Se uluk NAI Maromak la tulun ita karik, ita oinsaa loos?
Povu Israel koalia tuir ba:
2 “Se uluk NAI Maromak la tulun ita karik
bainhira inimigu ataka ita, ita oinsaa loos?”
3 Bainhira sira nia laran nakali hasoru ita,
sira sei tolan ita moris.
4 Bee sei sae hodi taka ita;
mota boot sei halo ita mout;
5 korenti bee sei sae makaas hodi dasa sai tiha ita.
6 Hahii NAI Maromak,
tanba Nia la husik atu ema lees ita ho sira nia nehan.
7 Kasador sira tau lasu mai ita,
maibee ita halai sai tiha ona hanesan manu fuik;
lasu nee kotu tiha ona,
nunee ita sai ho livre.
8 Ita hetan tulun husi NAI Maromak;
Nia mak halo lalehan ho rai.