135
Kantiku hahii Nai Maromak
1 Hahii NAI Maromak!
Hahii NAI nia naran;
NAI nia atan sira, hahii Nia ba.
2 Imi nebee halao knaar iha NAI nia uma,
iha ita nia Maromak nia uma kreda laran, hahii Nia ba.
3 Hahii NAI Maromak tanba NAI nee diak;
hananu hahii Nia naran, tanba nee buat furak ida.
4 Tanba NAI hili ona Jacó atu sai Ninian;
Nia hili povu Israel sai nudar Nia riku-soin rasik.
5 Hau hatene katak NAI Maromak nee boot;
ita nia Nai nee boot liu maromak sel-seluk.
6 NAI halo saida deit tuir Nia hakarak,
iha lalehan no iha rai,
iha tasi leten no mos iha tasi okos.
7 Nia halo kalohan mosu husi rai ulun too rai ikun iha mundu tomak;
Nia haruka rai lakan akompanha udan;
Nia lori sai anin husi Nia armazen laran.
8 Nia oho dasa tiha ema Ejitu nia oan mane boot;
ema nia oan primeiru ho mos animal nia oan primeiru, Nia oho hotu.
9 Imi ema Ejitu, uluk Nia haruka Nia sinal ho milagre ba iha imi nia klaran
hodi kontra imi nia liurai ho nia atan sira hotu.
10 Nia hamonu nasaun barak
hodi oho liurai bo-boot,
11 hanesan Sihon, ema Amori nia liurai,
Og, rai Basán nia liurai,
ho liurai hotu-hotu iha rai Kanaán.
12 Nia foo rai nee ba Nia povu Israel
nudar sira nia riku-soin.
13 NAI Maromak, Ita Boot nia naran dura tinan ba tinan;
NAI, Ita Boot nia naran sei temi beibeik husi jerasaun ba jerasaun.
14 Tanba NAI sei foo justisa ba Nia povu;
Nia sei hanoin Nia atan sira.
15 Nasaun jentiu sira adora fali estatua lulik
nebee ema kriatura mak halo husi osan mean ho osan mutin.
16 Iha ibun maibee la bele koalia,
iha matan maibee la bele haree.
17 Iha tilun maibee la bele rona,
no la iha iis sai husi sira nia ibun.
18 Ema nebee kria estatua lulik sira nee, sira sai hanesan fali buat nebee sira kria nee;
ema nebee fiar ba estatua sira nee mos sei sai nunee hotu.
19 Israel oan sira, hahii NAI ba;
Arão nia jerasaun sira, hahii NAI ba;
20 Levi nia jerasaun sira, hahii NAI ba;
imi sira nebee hamtauk NAI, hahii NAI ba.
21 Hahii NAI iha Siaun,
iha Nia hela fatin Jerusalém.
Hahii NAI Maromak!