149
Kantiku hahii Nai Maromak tanba Nia tulun Israel
1 Hahii NAI Maromak!
Hananu kantiku foun ba NAI Maromak;
hahii Nia iha Nia povu santu sira nia klaran.
2 Israel oan sira, kontenti ba, tanba Nia mak ita nia Kriador;
Siaun oan sira, haksolok ba, tanba Nia mak ita nia Liurai.
3 Mai ita bidu hodi hahii Nia naran;
mai ita baku tambor ho toka viola hodi halo muzika ba Nia,
4 tanba NAI Maromak nia laran haksolok ho Nia povu;
Nia tane aas ema mukit sira hodi halo sira manaan.
5 Maromak nia povu santu, mai ita haksolok tanba Nia foti aas ita;
mai ita hananu haksolok iha ita nia toba fatin.
6 Ita nia ibun sei hahii Maromak;
ita nia liman kaer surik oin-kotuk kroat hotu
7 hodi selu fali nasaun jentiu sira nia hahalok aat,
no kastigu sira nia povu;
8 atu kesi sira nia liurai ho korenti;
atu futu sira nia nai ulun sira ho korenti besi,
9 atu kastigu nasaun sira nee tuir desizaun nebee Maromak hatuun tiha ona.
Ho nunee Nia povu santu sai naran boot.
Hahii NAI Maromak!