148
Lalehan ho rai hahii Nai Maromak ba!
1 Hahii NAI Maromak!
Imi nebee iha lalehan, hahii NAI Maromak ba;
buat hotu iha leten aas ba, hahii Nia ba.
2 Maromak nia anju sira hotu, hahii Nia;
tropas lalehan nian, hahii Nia ba.
3 Loro matan ho fulan, hahii Nia;
fitun sira hotu nebee lakan nabilan, hahii Nia ba.
4 Lalehan leten aas ba, hahii Nia,
nunee mos bee hotu iha kalohan leten.
5 Buat sira nee hotu hahii NAI Maromak nia naran ba,
tanba Nia foo orden mak buat sira nee iha.
6 Nia harii buat sira nee nafatin ba nafatin;
orden nebee Nia foo nee vale tinan ba tinan.
7 Buat hotu-hotu iha mundu, hahii NAI Maromak ba!
Tasi laran klean ho animal bo-boot tasi nian,
8 rai lakan ho udan jelu fatuk, neve ho abu-abu,
anin boot makaas nebee halao Nia orden,
9 foho bo-boot ho foho kiik sira hotu,
ai nebee foo fuan ho ai huun sedru hotu-hotu,
10 animal fuik ho karau hotu-hotu,
animal nebee dolar iha rai ho mos manu fuik,
11 liurai mundu nian ho povu nasaun hotu-hotu,
liurai oan sira ho ukun nain sira hotu iha mundu,
12 mane klosan ho feto klosan sira,
ferik-katuas ho labarik sira.
13 Hotu-hotu hahii NAI Maromak nia naran ba,
tanba Nia naran boot liu hotu-hotu;
Nia kbiit aas liu lalehan ho rai.
14 Nia halo Nia povu sai forti tiha,
atu sira bele hahii Nia.
Sira nee mak ema nebee foo laran ba Nia;
sira nee ema Israel, ema nebee besik Nia.
Hahii NAI Maromak!