147
Salmu hahii Nai Maromak
1 Hahii NAI Maromak!
Ita hananu hahii ita nia Maromak, nee diak no furak teb-tebes,
tanba Nia serve duni atu ita hahii.
2 NAI Maromak harii fali Jerusalém;
Nia halibur fila fali Israel oan sira nebee ema soe ba iha rai seluk.
3 Nia kura ema nebee laran dodok,
no kurtivu sira nia kanek.
4 Nia desidi fitun hira mak iha lalehan
hodi foo naran ba fitun ida-idak.
5 Ita nia Nai nee boot ho kbiit makaas;
Nia matenek la iha rohan.
6 NAI Maromak foti sae ema mukit,
maibee soe ema aat tuun ba iha rai.
7 Hananu kantiku agradese nian ba NAI Maromak;
toka viola halo muzika ba ita nia Maromak.
8 Nia hodi kalohan taka lalehan;
Nia foo udan ba rai
hodi halo duut moris iha foho leten.
9 Nia foo ai haan ba animal
ho mos ba manu metan oan nebee lian hodi husu ai haan.
10 Laos kuda nia forsa mak halo kontenti NAI nia laran;
Nia laos haksolok tanba funu nain nebee forti.
11 Maibee NAI kontenti ho ema nebee mak hamtauk Nia;
Nia haksolok ho ema nebee mak laran metin ba Nia domin rohan-laek.
12 Jerusalém, tane aas NAI Maromak ba;
Siaun, hahii o nia Maromak ba.
13 Tanba Nia haforsa o nia portaun boot,
no foo bensaun ba o nia povu.
14 Nia halo o nia fronteira seguru,
no habosu o nia povu ho hahaan diak nian.
15 Nia hatuun Nia orden ba iha rai;
Nia liafuan semo lalais liu.
16 Nia kari neve hanesan bibi fulun mutin;
Nia halo namkari jelu fatuk rahun hanesan ahu kdesan.
17 Nia tuda tuun udan jelu fatuk hanesan britas.
See mak bele aguenta malirin boot nebee Nia hatuun nee?
18 Nia foo orden mak jelu nee nabeen;
Nia haruka anin mak bee suli tuun.
19 Nia foo sai Nia liafuan ba Jacó nia jerasaun;
Nia hatuun Nia lei ho regulamentu ba Israel.
20 Nia nunka halo nunee ba nasaun sel-seluk;
sira la hatene Nia lei.
Hahii NAI Maromak!