146
Hahii Nai Maromak tanba Nia diak
1 Hahii NAI Maromak!
Hau hatete ba hau nia aan, hahii NAI ba!
2 Iha hau nia moris tomak, hau sei hahii NAI;
durante hau sei moris hau hananu hahii hau nia Maromak.
3 Lalika tau laran ba ukun nain sira;
keta tau fiar ba ema kriatura, tanba sira la bele salva ema.
4 Bainhira sira nia iis kotu, sira fila fali ba rai rahun;
iha loron nee kedas, sira nia planu mos mate ona.
5 Ema nebee rekonhese Jacó nia Maromak nudar sira nia Ajudador,
ema nebee laran metin ba NAI nudar sira nia Maromak, sira hetan ksolok.
6 Nia mak Kriador lalehan ho rai,
tasi ho buat hotu iha laran;
Nia kaer metin Nia liafuan too tinan ba tinan.
7 Nia foo justisa ba sira nebee ema seluk hanehan;
Nia foo ai haan ba sira nebee hamlaha.
NAI hasai dadur sira;
8 NAI halo ema matan delek bele haree;
NAI foti sae ema nebee bonko tanba naha todan;
NAI hadomi ema nebee moris loos.
9 NAI tau matan ba ema lao rai;
Nia tulun oan kiak ho feto faluk sira,
maibee Nia halo kleuk tiha ema aat sira nia dalan.
10 NAI Maromak ukun tinan ba tinan;
Siaun oan sira, imi nia Maromak ukun husi jerasaun ba jerasaun.
Hahii NAI Maromak!