145
Hahii Nai Maromak tanba Nia laran diak
Salmu hahii nian husi David.
1 Hau nia Maromak, hau nia Liurai, hau sei foti aas Ita Boot;
hau sei hahii Ita Boot nia naran too tinan ba tinan.
2 Loro-loron hau sei hahii Ita Boot;
hau sei tane aas Ita Boot nia naran tinan ba tinan.
3 NAI Maromak nee boot, Nia serve atu ita hahii;
Nia boot teb-tebes, la iha ida mak bele kompriende too iha nebaa.
4 Jerasaun ida sei gaba Ita Boot nia servisu ba jerasaun tuir mai;
sira konta tutan buat boot nebee Ita Boot halo.
5 Hau sei foo sai Ita Boot nia naran boot ho kbiit nebee furak;
hau sei medita buat furak nebee Ita Boot halo tiha ona.
6 Sira sei konta buat makaas nebee Ita Boot halo;
hau sei foo sai katak Ita Boot nee makaas teb-tebes.
7 Sira selebra Ita Boot nia laran osan mean,
no haksolok hananu kona ba Ita Boot nia lia loos.
8 NAI Maromak nee laran luak no laran diak;
Nia Pasiensia Nain, no nakonu ho domin rohan-laek.
9 NAI diak ba ema hotu-hotu;
Nia hadomi buat hotu nebee Nia kria ona.
10 NAI, Ita Boot nia liman fatin sei agradese ba Ita Boot;
Ita Boot nia povu santu sei hahii Ita Boot.
11 Sira foo sai Ita Boot nia kbiit boot nudar Liurai,
no konta kona ba Ita Boot nia forsa,
12 atu nunee ema hotu bele hatene buat makaas nebee Ita Boot halo,
no Ita Boot nia ukun makaas ho furak teb-tebes.
13 Ita Boot mak Liurai tinan ba tinan;
Ita Boot ukun husi jerasaun ba jerasaun.
NAI Maromak sempre kaer metin Nia promesa;
Ninia hahalok tomak nakonu ho domin.
14 NAI tane ema nebee monu ba susar laran;
Nia foti sae ema nebee bonko tanba naha todan.
15 Kriatura hotu-hotu nia matan hateke ba Ita Boot,
atu Ita Boot foo ai haan ba sira tuir nia tempu.
16 Ita Boot loke liman,
buat moris hotu-hotu hetan ai haan too bosu.
17 NAI halo saida deit sempre loos;
Ninia hahalok tomak nakonu ho domin.
18 NAI besik ema nebee harohan ba Nia;
Nia besik ba see-see deit mak harohan ba Nia ho laran.
19 Nia hataan ema nebee hamtauk Nia tuir sira nia hakarak;
Nia rona sira nia halerik hodi salva sira.
20 NAI tau matan ba ema hotu nebee hadomi Nia,
maibee Nia sei halo rahun tiha ema aat sira hotu.
21 Hau nia ibun sei hahii NAI Maromak;
kriatura ida-idak hahii Nia naran santu
tinan ba tinan.