144
Liurai agradese Nai Maromak tanba manaan funu
Salmu David nian.
1 Hahii NAI Maromak, Nia mak fatuk lolon boot nebee satan netik hau;
Nia mak treinu hau nia liman atu halo funu;
Nia treinu hau nia liman fuan atu kaer kroat.
2 Nia nee hau nia Maromak Domin Nain, Nia mak lutu haleu hau,
hau nia abrigu no hau nia Salvador.
Nia mak defende hau, no hau hamahon aan iha Nia;
Nia halo nasaun sira seluk hakruuk mai hau.
3 NAI Maromak, ami ema kriatura nee see loos, too Ita Boot hanoin ami?
Ami ema kbiit-laek nee see loos, too Ita Boot interese ami?
4 Ami nee hanesan fali anin nebee huu liu deit;
ami nia moris hanesan lalatak nebee liu lalais deit.
5 NAI Maromak, loke Ita Boot nia lalehan hodi tuun mai;
kaer kona foho, atu nunee foho suar sai.
6 Haruka rai lakan hodi halo inimigu sira halai namkari;
hana Ita Boot nia rama oan halo sira halai lakon.
7 Husi leten aas ba hatuun Ita Boot nia liman mai
hodi hasai hau husi bee boot laran;
salva hau husi inimigu rai liur sira nia liman laran.
8 Tanba sira nia ibun nakonu ho buat bosok;
sira foti liman hodi halo juramentu falsu.
9 Maromak, hau sei hananu kantiku foun ba Ita Boot;
hau sei toka muzika ba Ita Boot ho viola tali sanulu.
10 Ita Boot mak halo liurai manaan;
Ita Boot salva Ita Boot nia atan David.
11 Salva hau husi surik nebee hamate ema;
hasai hau husi inimigu rai liur nia liman laran.
Sira nia ibun nakonu ho buat bosok;
sira foti liman hodi halo juramentu falsu.
12 Ami harohan atu ami nia oan mane joven sira
sai hanesan ai huun nebee buras ba dadauk,
no ami nia oan feto sira
sai hanesan ai riin palasiu nian nebee bahat tiha halo furak.
13 Ami husu atu ami nia armazen nakonu
ho ai haan oi-oin,
ami nia bibi aumenta rihun ba rihun,
tokon ba tokon iha ami nia rai,
14 no ami nia karau kabuk todan.
Ami harohan atu inimigu sira la bele baku rahun moru nebee haleu ami nia sidade,
inimigu sira la bele lori ami baa dadur iha rai seluk,
no la iha tanis halerik iha ami nia estrada boot.
15 Povu nebee mak moris hanesan nee, sira hetan ksolok;
povu nebee adora NAI nudar sira nia Maromak, sira hetan ksolok.