143
Orasaun husu tulun
Salmu David nian.
1 NAI Maromak, rona hau nia orasaun;
see tilun ba hau nia halerik, tanba Ita Boot sempre kaer metin Ita Boot nia liafuan;
hataan hau ba, tanba Ita Boot sempre halo buat nebee loos.
2 Keta haruka hau ata hataan iha Ita Boot nia oin kona ba sala nebee hau halo tiha ona,
tanba la iha ema ida mak moris loos iha Ita Boot nia futar oin.
3 Inimigu sira duni tuir hau;
sira sama hau ba rai;
sira dadur hau iha fatin nakukun
hanesan fali ema nebee mak mate kleur ona.
4 Nunee hau lakon esperansa;
hau nia laran tauk teb-tebes.
5 Hau hanoin fila fali tempu uluk nian;
hau reflete Ita Boot nia servisu hotu;
hau medita saida mak Ita Boot nia liman halo tiha ona.
6 Hau hasae hau nia liman halo orasaun ba Ita Boot;
hau hamrook ba Ita Boot hanesan rai maran dekor nebee hamrook ba udan been.
7 NAI Maromak, hataan hau lalais ba;
hau nia esperansa lakon ba dadauk.
Keta subar Ita Boot nia oin mai hau;
se lae hau sei hanesan ema nebee mak lao tuun dadauk ba rai kuak.
8 Dadeer-dadeer foo hanoin mai hau kona ba Ita Boot nia domin rohan-laek,
tanba hau laran metin ba Ita Boot.
Hatudu dalan nebee mak hau atu lao tuir,
tanba hau entrega hau nia moris ba Ita Boot.
9 NAI Maromak, salva hau husi hau nia inimigu sira,
tanba hau helik aan iha Ita Boot.
10 Hanorin hau atu halo tuir Ita Boot nia hakarak,
tanba Ita Boot mak hau nia Maromak.
Ita Boot nia Espiritu laran diak;
haruka Nia lori hau ba iha rai tetuk.
11 NAI Maromak, kuidadu hau nia moris atu ema foti aas Ita Boot nia naran;
hasai hau husi susar laran, tanba Ita Boot sempre halo buat nebee loos.
12 Ita Boot hadomi teb-tebes hau, nunee halo hau nia inimigu sira nonook tiha ba;
halo rahun tiha hau nia funu baluk sira,
tanba hau nee Ita Boot nia atan.