142
Orasaun husu tulun
Salmu David nian para hanorin ema. Orasaun bainhira David iha fatuk kuak laran.
1 Hau harohan ba NAI Maromak ho lian makaas;
hau hasae hau nia lian ba NAI hodi husu Nia tulun.
2 Hau fakar sai hau nia lia halerik iha Nia oin;
hau konta hau nia susar ba Nia.
3 Bainhira hau lakon esperansa,
Ita Boot hatene tuir hau nia moris.
Iha dalan nebee hau lao tuir,
ema subar lasu ba hau.
4 Haree ba, la iha ema ida iha hau nia liman loos;
la iha ema ida interese mai hau;
la iha tan subar fatin ba hau;
la iha ema ida hanoin hau.
5 NAI Maromak, hau halerik husu tulun ba Ita Boot;
hau dehan, “Ita Boot mak hau nia fatin seguru;
Ita Boot mak hau nia riku-soin iha mundu nee.”
6 Rona hau nia lia halerik ba,
tanba hau la bele liu ona;
salva hau husi ema nebee duni tuir hau,
tanba sira forsa liu hau.
7 Hasai hau husi dadur laran,
atu hau bele hahii Ita Boot nia naran.
Depois ema moris loos sei mai hodi haleu hau,
tanba Ita Boot haree hau diak.