15
See mak bele adora Nai Maromak
Salmu David nian.
1 NAI Maromak, see mak bele tama ba iha Ita Boot nia uma kreda?
See mak bele sae ba iha Ita Boot nia foho santu?
2 Ema nebee lao iha dalan loos,
no halo buat nebee loos;
nia koalia lia loos husi nia laran.
3 Nia la hatete aat ema,
no la halo buat aat hasoru nia maluk;
nia la hatuun ema seluk.
4 Nia hakribi ema aat,
maibee respeita ema nebee hamtauk NAI Maromak;
nia kaer metin nia promesa maski todan ba nia.
5 Nia foo empresta osan ba ema kiak,
la husu funan.
Nia lakohi simu ema nia osan para foo sasin falsu
kontra ema nebee la sala.
See deit mak halo buat sira nee
nunka atu nakdoko.