14
Halerik tanba ema nia hahalok aat
Salmu David nian, ba dirijenti koru.
1 Ema beik sira koalia iha sira nia laran dehan,
“Maromak la iha!”
Ema sira nee mesak aat deit; sira nia hahalok aat teb-tebes;
la iha ema ida mak halo buat diak.
2 NAI Maromak hateke tuun husi lalehan mai ita ema
hodi haree iha ema balu matenek ka lae,
ema balu harohan ba Maromak ka lae.
3 Maibee ema hotu lao sala dalan ona, sira hotu sai aat tiha ona;
la iha ema ida mak halo buat diak;
ida mos la iha.
4 Ema aat sira nee la hatene buat ida ka?
Sira haan matak hau nia povu hanesan fali sira haan halimar paun fuan ida;
sira nunka bolu NAI Maromak nia naran.
5 Maibee haree ba, ema sira nee sei tauk teb-tebes,
tanba Maromak hamutuk ho ema nebee moris loos.
6 Imi ema aat sira hamnasa fali ema kbiit-laek sira nia planu,
maibee NAI Maromak foo mahon ba kbiit-laek sira nee.
7 Hau harohan atu Maromak hamriik iha foho Siaun hodi salva Israel.
Bainhira NAI Maromak hadia fali Nia povu nia moris,
Jacó nia jerasaun sei haksolok, Israel sei kontenti.