17
Ema laran moos halerik husu justisa
Orasaun David nian.
1 NAI Maromak, hau husu justisa, rona hau ba;
foo atensaun ba hau nia halerik.
See tilun ba hau nia orasaun
tanba hau nia ibun la bosok ida.
2 Ita Boot sei deklara sai katak hau la sala,
tanba Ita Boot hatene saida mak loos.
3 Ita Boot hatene mo-moos hau nia laran;
iha kalan Ita Boot mai investiga hau.
Ita Boot koko tiha ona hau maibee la hetan buat aat ida iha hau;
hau nia ibun sempre koalia buat nebee loos.
4 Hau la halo tuir ema aat nia hahalok;
hau hadook aan husi dalan violensia nian,
tanba hau kaer metin Ita Boot nia ukun fuan.
5 Hau sempre lao tuir Ita Boot nia dalan;
hau nia ain la sidi ida.
6 Maromak, hau harohan ba Ita Boot, tanba Ita Boot sei hataan hau;
see tilun hodi rona hau nia lian.
7 Hatudu Ita Boot nia domin rohan-laek mai hau.
Ita Boot mak salva ema nebee buka mahon iha Ita Boot;
Bainhira sira iha Ita Boot nia liman loos,
sira nia inimigu la bele halo buat ida.
8 Proteje hau hanesan Ita Boot kuidadu Ita Boot nia matan fuan;
subar hau iha Ita Boot nia liras okos
9 atu ema aat la bele ataka hau;
atu inimigu sira nebee haleu hau la bele oho hau.
10 Ema sira nee fuan toos;
sira koalia gaba aan.
11 Agora sira lao toman ona hau hodi haleu hau,
sira nia matan lakan atu soe tuun hau ba iha rai.
12 Sira hanesan liaun nebee mak hakarak atu lees hau;
sira hanesan liaun siak nebee mak hafuhu hela atu ataka hau.
13 NAI Maromak, hamriik hasoru sira ba, hamonu sira ba;
ho Ita Boot nia surik salva hau husi ema aat sira nee.
14 NAI, hodi Ita Boot nia liman salva hau husi sira,
husi ema sira nebee mak hetan diak deit iha mundu nee.
Hau harohan atu buat nebee Ita Boot rai ba ema aat sira bele enxe sira nia kabun halo nakonu,
too sira nia oan sira bosu di-diak;
sira nia oan nurak sira mos hetan hotu.
15 Maibee hau nia matan sei haree Ita Boot,
tanba hau moris loos;
bainhira hau hadeer fali,
hau sei haksolok haree Ita Boot nia ilas.