18
Liurai David agradese ba Nai Maromak tanba halakon nia inimigu
Salmu husi NAI Maromak nia atan David, ba dirijenti koru. Salmu nee nia kanta ba NAI Maromak bainhira NAI Maromak hasai nia husi Saul nia liman laran ho mos husi nia inimigu sira. David kanta nunee.
1 NAI Maromak, hau hadomi Ita Boot;
Ita Boot mak hau nia forsa.
2 NAI mak fatuk kuak boot nebee hau subar iha laran;
Nia mak lutu haleu hau;
Nia hau nia Salvador.
Nia mak hau nia Maromak;
Nia mak fatuk kuak boot nebee hau subar iha laran.
Nia defende hau;
Nia kbiit salva hau;
Nia mak hau nia abrigu.
3 Hahii NAI Maromak! Tanba hau temi Nia naran,
Nia salva hau husi hau nia inimigu sira.
4 Uluk tali mate nian bobar tiha hau;
mota tuun makaas halo hau mout;
5 korenti rate nian futu ona hau;
lasu mate nian iha hela hau nia oin.
6 Iha susar laran hau temi NAI Maromak nia naran;
hau halerik husu tulun ba Maromak.
Husi Nia hela fatin, Nia rona hau nia lian;
hau nia lia halerik tama too iha Nia tilun.
7 Depois rai nakdoko no nakdedar;
foho nia huun nakdoko no nakdedar hotu,
tanba Nia hirus.
8 Suar sai husi Nia inus laran;
ahi lakan makaas sai husi Nia ibun laran;
ahi klaak lakan mean sai husi Nia ibun.
9 Nia loke lalehan hodi tuun mai;
kalohan metan iha hela Nia ain okos.
10 Nia manda anju tula Nia semo mai;
Nia haruka anin lori Nia mai lalais.
11 Nia falun Aan ho nakukun;
Nia taka Aan ho kalohan metan.
12 Iha Nia oin rai lakan fera kalohan metan nee,
jelu fatuk ho ahi lakan monu tuun.
13 NAI Maromak nia lian tarutu husi lalehan;
Maromak Aas Liu nia lian sai mai.
14 Nia hana Nia rama, inimigu sira halai namkari;
Nia haruka rai lakan boot duni lakon tiha sira.
15 NAI, Ita Boot siak sira
hodi huu iis makaas sai husi inus.
Ho nunee Ita Boot halo tasi been sai maran tiha,
no kolu molik tiha mundu.
16 Husi fatin aas nebaa, Maromak nia liman kaer metin hau;
Nia dada hau sai husi bee naruk nia laran.
17 Nia salva hau husi hau nia inimigu nebee forti,
husi ema nebee odi hau no makaas liu hau.
18 Iha dezastre laran sira ataka hau,
maibee NAI Maromak tane hau.
19 Nia lori hau ba iha rai luan;
Nia salva hau tanba Nia haksolok ho hau.
20 NAI haree hau diak tanba hau moris loos;
Nia halo diak mai hau tanba hau nia liman moos.
21 Hau lao tuir nafatin NAI nia dalan;
hau nunka fila kotuk ba hau nia Maromak.
22 Nia lei tomak sempre iha hau nia oin;
hau la lao sees husi Nia ukun fuan.
23 Nia haree hau nia laran moos hela;
hau kuidadu hau nia aan atu la bele halo sala.
24 NAI halo diak mai hau tanba hau moris loos,
Nia hatene hau nia liman moos.
25 NAI Maromak, Ita Boot foo laran ba ema nebee foo laran ba Ita Boot;
Ita Boot hatudu laran diak ba ema nebee laran moos.
26 Ita Boot sempre halo loos ba ema nebee moris loos,
maibee Ita Boot hatene oinsaa hasoru ema nebee halo manobra.
27 Ita Boot salva ema kbiit-laek sira,
maibee hatuun ema nebee mak foti aan.
28 NAI Maromak, Ita Boot mak halakan hau nia ahi oan:
Hau nia Maromak leno hau iha nakukun laran.
29 Ho Ita Boot nia tulun
hau bele avansa hodi kontra tropas inimigu sira;
ho hau nia Maromak nia ajuda
hau bele haksoit liu sira nia moru aas hodi tama ba laran.
30 NAI Maromak nee, Nia dalan perfeitu:
Nia liafuan sempre loos;
Nia defende ema nebee mak buka mahon iha Nia.
31 So NAI deit mak Maromak, la iha tan seluk.
So ita nia Maromak deit mak fatuk lolon boot nebee hau helik ba.
32 Maromak mak foo forsa mai hau;
Nia kuidadu hau iha dalan.
33 Nia halo hau nia ain hanesan rusa fuik nian;
Nia halo hau hamriik metin iha fatin aas.
34 Nia treinu hau atu halo funu,
nunee hau bele uza rama diak nian hodi hana.
35 NAI Maromak, Ita Boot defende hau hodi salva hau nia moris;
Ita Boot tane hau;
Ita Boot nia tulun halo hau sai ema boot.
36 Ita Boot prepara dalan luan atu hau lao tuir,
ho nunee hau nia ain la sidi ba buat ida.
37 Hau duni tuir hau nia inimigu sira too toman sira;
hau la hakiduk too sira mohu hotu.
38 Hau halo rahun tiha sira too sira la bele hamriik tan;
sira monu iha hau nia ain okos.
39 Ita Boot foo forsa mai hau atu halo funu;
Ita Boot halo ema nebee kontra hau hakruuk mai hau.
40 Ita Boot halo hau nia inimigu sira halai rungu-ranga;
hau halo rahun tiha ema nebee odi hau.
41 Sira tanis husu tulun, maibee la iha ema ida atu salva sira;
sira halerik husu tulun ba NAI Maromak, maibee Nia la hataan.
42 Hau baku rahun sira hanesan rai rahun nebee anin lori;
hau sama sira hanesan ema sama tahu iha dalan.
43 Ita Boot salva hau bainhira povu ataka hau;
Ita Boot halo hau sai nai ulun ba nasaun jentiu sira;
ema nebee uluk hau la konhese agora serbi hau.
44 Ema rai liur foin rona hau nia lian, sira halo tuir kedas;
sira lao hakruuk too iha hau nia oin.
45 Sira nia fuan lakon;
sira sai husi sira nia abrigu ho tauk no nakdedar.
46 Hahii NAI Maromak! Maromak nee moris!
Nia mak fatuk lolon boot nebee hau helik ba.
Foti aas Nia naran!
Nia mak hau nia Salvador.
47 Maromak mak selu fali buat nebee hau nia inimigu sira halo mai hau;
Nia hamonu nasaun jentiu sira iha hau nia okos;
48 Maromak salva hau husi hau nia inimigu sira.
Tebes, Ita Boot foti hau aas liu hau nia funu baluk sira;
Ita Boot salva hau husi ema nebee gosta violensia.
49 Tanba nee NAI Maromak, hau sei hahii Ita Boot iha nasaun hotu-hotu nia klaran;
hau sei hananu hahii Ita Boot nia naran.
50 Maromak foo vitoria ba liurai nebee Nia hili hodi halo nia manaan liu dook;
Nia hatudu Nia laran luak ba liurai nebee mak Nia fihir,
ba David ho nia jerasaun nafatin ba nafatin.