19
Nai Maromak nia liman fatin ho Nia lei hatudu sai Nia furak
Salmu David nian, ba dirijenti koru.
1 Lalehan konta sai Maromak nia kbiit boot
hodi deklara buat furak nebee Nia liman kria tiha ona.
2 Loron hatoo lia menon ba loron;
kalan foo sai matenek ba kalan.
3 Lalehan nee la koalia, la uza liafuan;
la iha lian ruma mak atu bele rona husi nebaa.
4 Maski nunee lalehan nia lian sai ba iha rai tomak;
nia liafuan too iha rai ulun rai ikun iha mundu tomak.
Iha lalehan Maromak harii hela tenda ba loro matan.
5 Loromatan nee mosu mai hanesan noivu ida nebee hakat sai husi nia festa kazamentu;
nia lao hanesan mane forti ida nebee haksolok hodi halai tuir dalan.
6 Loromatan lao tuir lalehan husi rohan ba rohan;
buat hotu-hotu senti loron nia manas.
7 NAI Maromak nia lei perfeitu,
halo ita nia moris sai matak.
NAI nia mandamentu ita bele konfia,
halo ema matan tomak sai matenek.
8 NAI nia regra loos,
halo haksolok ita nia laran.
NAI nia ukun fuan nabilan,
leno ita nia matan.
9 Ita hamtauk ba NAI, nee diak,
dura tinan ba tinan.
NAI nia desizaun sempre loos,
justu ba ema hotu-hotu.
10 Buat sira nee folin boot liu osan mean,
liu fali osan mean moos nian;
midar liu bani been,
liu fali bani been nebee husi nia knuuk.
11 Buat sira nee hanorin Ita Boot nia atan;
see mak kaer metin, hetan bensaun boot.
12 Maibee see mak bele hatene nia sala rasik?
Perdua hau nia sala nebee hau rasik la rekonhese.
13 Kuidadu mos Ita Boot nia atan hau husi hahalok nebee hau rasik hatene katak nee sala;
keta husik sala hirak nee domina hau.
Nunee hau sei livre husi hahalok aat;
hau sei la halo sala hasoru Ita Boot.
14 Hau harohan atu hau nia liafuan ho hau nia reflesaun
monu ba Ita Boot nia laran.
NAI Maromak, Ita Boot mak fatuk lolon boot nebee hau helik ba;
Ita Boot mak hau nia Salvador.