21
Kantiku hahii Nai Maromak tanba liurai manaan funu
Salmu David nian, ba dirijenti koru.
1 NAI Maromak, liurai haksolok haree Ita Boot nia kbiit;
nia kontenti teb-tebes tanba Ita Boot halo nia manaan.
2 Ita Boot foo buat nebee nia laran hakarak;
buat nebee nia ibun husu, Ita Boot hataan duni.
3 Ita Boot simu liurai hodi foo bensaun boot ba nia;
Ita Boot tau koroa osan mean diak nian ba iha nia ulun.
4 Nia husu Ita Boot atu foo vida naruk, Ita Boot foo;
Ita Boot halo nia moris nafatin ba nafatin.
5 Ita Boot halo liurai manaan, nunee nia naran sai boot;
Ita Boot halo nia sai konhesidu, no ema respeita teb-tebes nia.
6 Loos duni, Ita Boot foo bensaun ba nia la hotu la remata;
Ita Boot halo nia haksolok teb-tebes iha Ita Boot nia oin.
7 Liurai konfia NAI Maromak;
Maromak Aas Liu nia domin rohan-laek
halo liurai la nakdoko.
8 Liurai, o nia liman sei kaer o nia inimigu sira hotu;
o nia liman loos sei kaptura ema nebee odi o.
9 Bainhira o mosu iha sira nia oin,
o sei soe sira ba iha ahi lakan boot.
NAI Maromak sei hirus hodi tolan tiha sira;
Nia ahi sei haan mutuk tiha sira.
10 O sei halo rahun tiha sira nia jerasaun iha mundu;
sira nia bei-oan sei lakon mohu husi ema nia klaran.
11 Maski o nia inimigu sira kombina malu hasoru o
hodi halo manobra oi-oin, sira sei la manaan.
12 O hana sira ho o nia rama,
halo sira halai tiha.
13 NAI Maromak, hodi Ita Boot nia forsa hamriik ba!
Ami sei hananu hodi hahii Ita Boot nia kbiit.