22
Harohan ba Nai Maromak iha susar laran
Salmu David nian, ba dirijenti koru. Tuir muzika Rusa Dadeer-saan.
1 Hau nia Maromak, hau nia Maromak, tansaa mak Ita Boot husik hau mesak?
Hau halerik ho laran dodok para Ita Boot tulun hau;
tansaa mak Ita Boot dook loos husi hau?
2 Hau nia Maromak, loron hau halerik husu tulun, maibee Ita Boot la hataan;
hau halerik kalan, maibee la hetan pas.
3 Ita Boot mak santu;
Ita Boot mak Liurai nebee ema Israel sira adora.
4 Ami nia bei-ala sira fiar Ita Boot;
sira fiar mak Ita Boot tulun sira.
5 Sira tanis hakilar ba Ita Boot mak Ita Boot salva sira;
sira fiar ba Ita Boot la saugati.
6 Maibee hau hanesan ular oan deit, laos ema;
ema hotu hatete aat hau, no hakribi hau.
7 Ema hotu nebee haree hau hamoe hau;
sira dulas ibun mai hau hodi doko ulun.
8 Sira dehan, “Nia fiar NAI Maromak;
husik Maromak mak salva nia.
Se Maromak kontenti ho nia,
entaun Maromak mak hasai nia ba.”
9 Maibee Ita Boot mak lori hau sai husi hau nia inan nia kanotak;
Ita Boot hatoba hau iha hau nia inan nia hirus matan.
10 Husi kedas hau moris, hau nee Ita Boot nian;
desde hau sei iha hau nia inan nia kabun laran, Ita Boot sai tiha ona hau nia Maromak.
11 Keta dook husi hau,
tanba susar besik hela hau,
no ema atu tulun hau la iha.
12 Karau aman barak haleu hau;
karau aman mesak forti deit mak serku hau.
13 Sira hanesan liaun nebee hakilar hodi lees ema;
sira loke sira nia ibun luan hodi kontra hau.
14 Hau nia forsa hanesan bee nebee fakar sai ba rai;
hau nia ruin sira hotu naksalak tiha ona.
Hau nia fuan hanesan lilin
nebee nabeen tiha ona iha hau nia laran.
15 Hau nia ibun maran dekor hanesan sanan rai;
hau nia nanaal toos tiha ona iha hau nia ibun laran;
Ita Boot latan tiha ona hau iha rai rahun.
16 Ema aat lubuk ida hobur hau;
sira serku hau hanesan asu;
sira sona borus hau nia liman ho ain.
17 Hau nia ruin tomak bele sura;
ema hateke mai hau no fihir hau.
18 Sira fahe hau nia hena ba malu;
sira dada rifa para hatene, hau nia hena nee monu ba see.
19 Maibee NAI Maromak, Ita Boot keta dook husi hau.
Ita Boot mak hau nia forsa; mai lalais tulun hau.
20 Salva hau husi surik;
salva hau nia moris husi asu forti sira nee.
21 Dada sai hau husi liaun nia ibun laran;
salva hau husi karau fuik nia dikur.
22 Hau sei koalia sai ba hau nia maluk sira kona ba Ita Boot nia diak;
iha povu nia leet hau sei hahii Ita Boot.
23 Imi sira nebee hamtauk NAI Maromak, hahii NAI ba!
Imi Jacó nia jerasaun, hotu-hotu foti aas NAI ba!
Imi Israel nia jerasaun, hotu-hotu respeita Nia ho tauk ba!
24 Tanba Nia la hakribi no la hatuun
ema nebee terus ho susar.
Nia la subar oin ba sira,
maibee see tilun ba sira bainhira sira halerik husu tulun.
25 Hau sei hahii Ita Boot iha ema lubuk boot nia leet;
iha fiar nain sira nia oin hau sei foo oferta nebee hau promete tiha ona atu foo ba Ita Boot.
26 Ema kiak sira sei haan too bosu;
ema nebee buka NAI Maromak sei hahii Nia.
Hau hein katak sira hetan moris diak too tinan ba tinan.
27 Ema husi rai ulun too rai ikun iha mundu tomak
sei hanoin NAI Maromak hodi fila ba Nia;
ema husi suku hotu-hotu
sei hakneak hakruuk iha Nia oin.
28 Tanba NAI mak Ukun Nain;
Nia ukun nasaun hotu-hotu.
29 Ema riku hotu-hotu iha mundu sei halo festa hodi adora Nia;
ema nebee atu tuun ba iha rai rahun, sira hotu sei hakneak iha Nia oin.
30 Ema nebee seidauk moris sei serbi Nia;
jerasaun sira aban-bainrua sei koalia kona ba Nai Maromak.
31 Sira sei foo sai Nia salvasaun;
sira sei foo hatene ba ema sira nebee seidauk moris
katak Maromak salva tiha ona Nia povu.