24
Nai Maromak mak Liurai boot
Salmu David nian.
1 Mundu ho buat hotu iha mundu nee, NAI Maromak nian;
rai ho buat hotu nebee moris iha rai nee, Ninian hotu.
2 Tanba Nia mak harii buat hirak nee iha tasi leten;
Nia hatuur buat sira nee hotu iha bee leten.
3 See mak bele sae ba NAI Maromak nia foho?
See mak bele hamriik iha Nia fatin santu?
4 Ema nebee liman moos ho laran moos,
ema nebee la adora fatuk lulik ka ai lulik,
ema nebee la halo juramentu falsu.
5 Ema sira nee sei simu bensaun husi NAI Maromak;
Maromak nudar sira nia Salvador sei deklara katak sira la sala.
6 Ema hanesan nee mak harohan ba Maromak;
sira hakbesik aan ba Jacó nia Maromak.
7 Imi portaun sira, foti sae imi nia ulun ba;
imi odamatan antigu nian, loke aan ba,
para Liurai kbiit boot bele tama mai.
8 Liurai kbiit boot nee see?
Nia nee NAI Maromak, Nia forsa teb-tebes ho kbiit boot;
Nia nee NAI Maromak, funu nain boot.
9 Imi portaun sira, foti sae imi nia ulun ba;
imi odamatan antigu nian, loke aan ba,
para Liurai kbiit boot bele tama mai.
10 Liurai kbiit boot nee see?
NAI Maromak Aswain,
Nia mak Liurai kbiit boot.