25
Orasaun husu tulun ba Nai Maromak
Salmu David nian.
1 NAI, hau nia Maromak,
hau konfia Ita Boot.
2 Hau fiar Ita Boot;
keta husik hau moe leet;
keta husik hau nia inimigu sira mak manaan.
3 Ema nebee laran metin ba Ita Boot,
sei la moe leet;
ema nebee traidor nar-naran deit,
nia mak moe.
4 NAI Maromak, hatudu Ita Boot nia dalan mai hau;
hanorin hau atu lao tuir Ita Boot nia ain fatin.
5 Tulun hau atu moris tuir Ita Boot nia lia loos, no hanorin hau,
tanba Ita Boot mak hau nia Salvador;
loron-kalan hau laran metin ba Ita Boot.
6 NAI, hori uluk kedas Ita Boot hatudu ona Ita Boot nia laran luak ho domin rohan-laek;
hatudu nafatin ba.
7 Keta hanoin tan pekadu nebee hau halo bainhira sei joven;
haluha tiha sala nebee hau halo kontra Ita Boot.
NAI, hanoin hau ba,
tanba Ita Boot nia domin ho Ita Boot nia diak.
8 NAI Maromak nee laran diak no laran moos,
nunee mak Nia hanorin sala nain sira tuir Nia dalan.
9 Nia tulun ema mukit sira atu halo buat nebee loos;
Nia hanorin sira kona ba Nia dalan.
10 NAI nia dalan nakonu ho domin ho lia loos;
Nia hatudu dalan nee ba ema sira nebee kaer metin Nia promesa ho Nia lei.
11 NAI Maromak, hau nia sala boot, perdua hau ba,
atu nunee ema foti aas Ita Boot nia naran.
12 Ema nebee mak hamtauk NAI Maromak,
Maromak sei hanorin sira oinsaa atu moris.
13 Sira sei moris diak;
sira nia jerasaun sei hela metin nafatin iha sira nia rain.
14 NAI sai belun ba ema nebee hamtauk Nia;
Nia foo hatene Nia promesa ho Nia lei ba sira.
15 Hau nia matan hateke metin ba NAI,
tanba so Nia deit mak sei hasai hau nia ain husi lasu laran.
16 See oin mai hau hodi hanoin hau ba,
tanba hau mesak deit no kbiit-laek.
17 Halo kamaan susar nebee iha hau nia laran;
hasai hau husi terus laran.
18 Hateke ba hau nia naha todan ho hau nia laran taridu;
hamoos tiha hau nia sala hotu.
19 Haree ba, hau nia inimigu barak teb-tebes;
sira odi loos hau!
20 Kuidadu hau nia moris hodi salva hau;
keta husik ema hamoe hau,
tanba hau hamahon aan iha Ita Boot.
21 NAI Maromak, hau hein katak hau nia hahalok loos ho laran moos bele proteje hau,
tanba hau laran metin iha Ita Boot.
22 Maromak, salva Israel
husi susar laran ba!