26
Ema laran moos harohan husu justisa
Salmu David nian.
1 NAI Maromak, foo justisa mai hau,
tanba hau ema nebee moris loos;
hau konfia NAI ho laran tomak.
2 NAI, koko hau no prova hau ba;
tetu di-diak hau nia neon ho laran,
3 tanba hau sempre hanoin hela deit Ita Boot nia domin rohan-laek,
no hau konfia Ita Boot tanba Ita Boot sempre kaer metin Ita Boot nia liafuan.
4 Hau la tuur hamutuk ho ema lohi door;
hau mos la ranxu ema nebee koalia oin ida hahalok oin seluk.
5 Hau haree ema aat sira halibur hamutuk, hau hakribi;
hau lakohi tuur hamutuk ho ema nebee hahalok aat.
6 NAI Maromak, hau nia liman moos hatudu katak hau la sala;
hau lao haleu Ita Boot nia altar
7 hodi hahii Ita Boot ho lian makaas
no konta sai buat furak nebee Ita Boot halo tiha ona.
8 NAI Maromak, hau gosta uma nebee mak Ita Boot hela ba,
fatin nebee mak Ita Boot nia naroman nabilan horik ba.
9 Keta dasa sai hau hamutuk ho sala nain sira;
keta hasai hau nia vida hamutuk ho ema nebee hamrook ba raan.
10 Sira nia liman toman halo buat aat;
sira nia liman loos nakonu ho korupsaun.
11 Maibee hau nee ema nebee moris loos;
salva hau, hatudu Ita Boot nia laran luak mai hau.
12 Hau nia ain hamriik metin iha rai tetuk;
Hau sei hahii NAI Maromak iha ema lubuk boot nia leet.