27
Hahii Nai Maromak no husu tulun
Salmu David nian.
1 NAI Maromak nia naroman leno hau nia dalan;
Nia mak hau nia Salvador.
Hau atu tauk see?
NAI mak abrigu ba hau nia moris.
Hau atu nakdedar ba see?
2 Bainhira ema aat mai atu tolan hau,
hau nia inimigu ho funu baluk sira nee mak sei sidi no monu.
3 Maski tropas mai serku hau,
hau nia laran sei la tauk;
maski funu mosu kontra hau,
hau fiar nafatin.
4 Iha deit buat ida mak hau husu ba NAI Maromak;
ida nee deit mak hau buka.
Hau hakarak atu loro-loron durante hau nia moris tomak,
hau hela iha NAI nia uma
hodi hateke ba NAI nia furak,
no harohan ba Nia iha Nia uma kreda.
5 Tanba iha tempu susar,
Nia sei halo hau hakmatek iha Nia tenda laran;
Nia sei subar hau iha Nia fatin santu;
Nia sei hatuur hau iha fatuk boot ida nia leten.
6 Nia foti aas tiha ona hau
iha hau nia inimigu sira hotu nia klaran.
Hau sei haklalak hodi lori sakrifisiu ba iha Nia fatin santu;
hau sei hananu no halo muzika ba NAI.
7 NAI Maromak, bainhira hau bolu Ita Boot, see tilun mai hau;
hatudu Ita Boot nia laran diak hodi hataan mai hau.
8 Hau hatete ba hau nia aan, “Adora Nia ba!”
NAI, hau sei adora duni Ita Boot.
9 Keta subar Ita Boot nia oin mai hau;
keta duni sai Ita Boot nia atan ho hirus,
tanba Ita Boot tulun tiha ona hau.
Maromak hau nia salvador,
keta duni hau fila, keta husik hau mesak.
10 Maski hau nia inan-aman husik hau mesak mos,
NAI, Ita Boot sei simu hau.
11 NAI Maromak, hanorin Ita Boot nia dalan mai hau;
lori hau tuir dalan loos
tanba hau iha inimigu barak.
12 Keta saran hau ba hau nia funu baluk sira,
tanba iha sasin falsu hamriik hasoru hau;
sira duun matak hau hodi ameasa hau.
13 Hau fiar katak hau sei moris
hodi haree NAI nia diak.
14 Laran metin ba NAI;
sai forti ba, aten brani ba.
Laran metin ba NAI!