28
Harohan husu tulun
Salmu David nian.
1 NAI Maromak, hau harohan ba Ita Boot.
Ita Boot mak fatuk lolon boot nebee hau helik ba;
keta taka tilun mai hau.
Se Ita Boot nonook nafatin,
hau sei sai hanesan sira nebee mak tuun ba rai kuak.
2 Hau see oin ba iha Ita Boot nia Fatin nebee Lulik Liu
hodi foti sae hau nia liman;
hau halerik husu tulun ba Ita Boot;
rona hau nia lian ba!
3 Keta duni sai hau hamutuk ho ema aat sira,
hamutuk ho sira nebee mak toman halo buat aat,
sira nebee mak finji koalia diak ba sira nia maluk,
maibee rai odi iha laran.
4 Selu fali sira tuir saida mak sira halo;
foo ba sira tuir sira nia hahalok aat.
Selu fali sira tuir saida mak sira nia liman halo tiha ona;
foo todan ba sira tuir sira merese simu.
5 Sira la rekonhese buat nebee mak NAI Maromak halo tiha ona
ho buat nebee mak Nia liman kria tiha ona.
Nunee Nia sei sobu sira,
no nunka atu harii fila fali.
6 Hahii NAI Maromak,
tanba Nia rona ona hau nia halerik husu tulun.
7 NAI mak hau nia forsa, Nia defende hau;
hau nia laran metin ba Nia;
Nia tulun hau hodi halo hau nia laran haksolok teb-tebes;
hau hananu hau nia kantiku hodi hahii Nia.
8 NAI Maromak foo forsa ba Nia povu;
Nia mak abrigu hodi salva liurai nebee mak Nia hili tiha ona.
9 NAI, salva Ita Boot Nia povu.
Sira nee Ita Boot nia riku-soin, foo bensaun ba!
Sai sira nia Bibi Atan
hodi tau matan ba sira tinan ba tinan.