29
Nai Maromak nia lian hanesan rai lakan ho rai tarutu
Salmu David nian.
1 Imi sira nebee hela iha lalehan, hahii NAI Maromak ba;
hahii NAI tanba Nia kbiit boot ho forsa.
2 Hahii NAI tanba nia naran boot;
adora Nia tanba Nia santu ho furak.
3 NAI Maromak nia lian baku iha tasi leten;
Maromak kbiit boot nia lian tarutu;
NAI nia lian tarutu iha tasi boot nia leten.
4 NAI nia lian makaas teb-tebes;
NAI nia lian hatudu sai Nia kbiit.
5 NAI nia lian silu tohar ai huun boot sedru;
too ai huun boot iha foho Líbanu nian mos NAI fera tiha sai rohan-rohan.
6 Nia halo foho Líbanu nian haksoit hanesan fali karau oan;
foho Sirión mos haksoit hanesan karau fuik nia oan.
7 NAI nia lian halo rai lakan makaas.
8 NAI nia lian doko rai fuik maran;
NAI doko rai fuik maran Kades nian.
9 NAI nia lian dulas ai huun boot,
too ai huun sira iha ai laran tuan mos tahan namtate hotu.
Iha Nia uma kreda, ema hotu-hotu haklalak dehan,
“Foti aas Nia naran!”
10 NAI Maromak tuur iha Nia kadeira ukun iha bee boot leten;
NAI tuur hodi ukun nudar Liurai tinan ba tinan.
11 NAI foo kbiit ba Nia povu;
NAI foo bensaun ba Nia povu hodi foo pas ho hakmatek ba sira.