30
Agradese ba Nai Maromak tanba hetan kura
Salmu David nian. Kantiku bainhira selebra loron inaugurasaun uma kreda.
1 NAI Maromak, hau sei gaba Ita Boot,
tanba Ita Boot dada tiha ona hau sai husi rai kuak;
Ita Boot la husik hau nia inimigu sira foti aan hasoru hau.
2 NAI, hau nia Maromak, uluk hau halerik husu tulun ba Ita Boot;
agora Ita Boot kura tiha ona hau.
3 NAI, Ita Boot lori ona hau sai husi matebian sira nia fatin;
Ita Boot la husik hau lao hamutuk ho ema sira nebee tuun dadauk ba rai kuak.
4 Imi povu nebee foo laran ba NAI Maromak, hananu hahii Nia ba;
hahii Nia naran santu,
5 tanba Nia hirus iha tempu badak deit,
maibee Nia hatudu Nia laran luak ba ita durante ita nia moris tomak.
Ita bele tanis halerik iha oras kalan,
maibee iha dadeer-saan ita hetan ksolok.
6 Uluk hau senti hakmatek, hau dehan,
“Hau nunka atu nakdoko.”
7 NAI Maromak, bainhira Ita Boot hatudu Ita Boot nia laran luak mai hau,
Ita Boot halo hau hamriik metin hanesan foho boot ida.
Maibee bainhira Ita Boot subar oin mai hau,
hau nia fuan taridu.
8 NAI Maromak, uluk hau harohan ba Ita Boot;
hau husu atu Nai hanoin hau.
9 Hau dehan, “Se karik hau mate,
se karik hau tuun ba iha rai kuak, iha folin saida?
Rai rahun bele hahii Ita Boot ka?
Rai rahun bele deklara katak Ita Boot nia laran diak dura nafatin ka?
10 NAI, rona hau, hatudu Ita Boot nia laran luak mai hau;
NAI, ajuda hau ba!”
11 Uluk hau tanis lelir,
maibee Ita Boot foo ksolok mai hau, halo hau bidu.
Ita Boot hasai tiha hena lutu nian husi hau
hodi foo hatais fali hena ksolok nian.
12 Nunee hau sei la nonook; hau sei hananu hahii Ita Boot.
NAI, hau nia Maromak, hau sei agradese ba Ita Boot tinan ba tinan.