31
Hakmatek iha Nai Maromak nia liman laran
Salmu David nian, ba dirijenti koru.
1 NAI Maromak, hau hamahon aan iha Ita Boot;
keta husik hau moe leet;
salva hau tanba Ita Boot sempre halo buat nebee loos.
2 See tilun mai hau;
mai lalais hodi salva hau.
Sai hau nia subar fatin, hanesan fatuk lolon boot para hau helik ba;
sai hanesan lutu metin ida hodi satan netik hau.
3 Ita Boot mak fatuk kuak nebee hau subar iha laran;
Ita Boot mak lutu haleu hau.
Lori hau hodi hatudu dalan mai hau,
atu nunee ema foti aas Ita Boot nia naran.
4 Kuidadu hau para hau la bele monu ba lasu nebee ema prepara hela ba hau,
tanba Ita Boot mak hau nia subar fatin.
5 Hau entrega hau nia moris ba iha Ita Boot nia liman;
NAI Maromak, Ita Boot nia laran sempre hanoin hau, salva hau ba.
6 NAI Maromak, hau odi ema nebee adora estatua lulik, buat sira nee la iha folin.
Hau laos hanesan ema sira nee, hau konfia Ita Boot.
7 Hau sei kontenti haksolok
tanba Ita Boot nia domin rohan-laek.
Ita Boot haree tiha ona hau nia terus;
Ita Boot hatene ona hau nia laran susar.
8 Ita Boot la entrega hau ba inimigu sira nia liman laran,
maibee tau hau nia ain iha fatin luan.
9 NAI Maromak, hau iha fatin kloot laran;
hanoin hau ba.
Hau nia matan sai malahuk tiha tanba hau nia laran dodok;
hau nia isin ho klamar terus hotu.
10 Hau nia vida nakonu ho tristi;
hau nia moris tomak hau halerik hela deit.
Terus ho susar nee halo hau nia forsa tuun ba dadauk
too hau nia ruin sira mamar hotu ona.
11 Hau nia inimigu sira hatuun hau;
hau nia vizinhu sira hatete aat hau;
hau nia belun sira haree hau, sira tauk;
ema nebee hasoru hau iha estrada halai sees tiha.
12 Ema haluha hau hanesan fali hau mate tiha ona;
hau hanesan vazu nebee nakfera tiha ona.
13 Hau rona ema barak bis-bisu
hodi hatauk hau husi sor-sorin.
Sira kombina malu hodi kontra hau;
sira halo planu atu hasai hau nia vida.
14 Maibee NAI, hau konfia Ita Boot;
hau dehan, “Ita Boot mak hau nia Maromak.”
15 Hau nia vida tomak iha Ita Boot nia liman laran;
hasai hau husi hau nia inimigu sira nia liman,
husi ema nebee halo terus hau.
16 Halo Ita Boot nia oin leno Ita Boot nia atan hau;
salva hau hodi Ita Boot nia domin rohan-laek.
17 NAI, hau harohan ba Ita Boot;
keta husik hau moe leet.
Husik ema aat sira mak moe ba;
husik sira tuun lian-laek ba iha ema mate nia fatin.
18 Halo sira nia ibun nonook tiha,
tanba sira foti aan hatuun ema nebee moris loos
hodi hatete aat sira.
19 Ita Boot rai hela buat mesak furak
hodi foo ba ema nebee hamtauk Ita Boot;
iha ema hotu nia oin, Ita Boot haraik buat diak sira nee
ba ema nebee buka mahon iha Ita Boot.
20 Ita Boot subar sira iha Ita Boot nia prezensa
atu ema nia planu aat la bele kona sira;
Ita Boot halo sira seguru iha Ita Boot nia fatin,
dook husi ema nebee duun sira.
21 Hahii NAI Maromak,
tanba Nia hatudu Nia domin nebee furak teb-tebes mai hau.
Bainhira inimigu sira serku hau,
22 hau tauk hodi hanoin,
“Maromak dasa sai tiha ona hau husi Nia oin!”
Maibee lae, bainhira hau halerik husu tulun ba Nia,
Nia rona hela hau nia orasaun.
23 Povu hotu nebee foo laran ba NAI Maromak, hadomi Nia ba!
NAI tau matan ba ema nebee moris loos,
maibee ema nebee foti aan, Nia foo kastigu tuir sira nia hahalok.
24 Imi sira nebee laran metin ba NAI,
sai forti ba, aten brani ba!