32
Haksolok tanba hetan perdaun husi Nai Maromak
Salmu David nian para hanorin ema.
1 Se ema kontra Maromak nia lei maibee Maromak foo perdaun,
ema nee hetan bensaun.
Se nia halo sala maibee Maromak hamoos tiha nia sala,
ema nee hetan ksolok.
2 Se NAI Maromak la husu tuir ona nia sala,
no ema nee la hatene bosok,
ema nee hetan bensaun.
3 Uluk bainhira hau lakohi foo sai hau nia sala,
loron tomak hau halerik hela deit,
too hau nia ruin sira sai mamar hotu.
4 Tanba loron-kalan
Ita Boot nia liman hanehan makaas hau;
hau nia forsa lakon tiha
hanesan bee nebee maran iha bailoron.
5 Too ikus hau foo sai tiha hau nia sala ba Ita Boot;
hau la subar tan hau nia pekadu.
Hau dehan, “Hau sei konfesa hau nia hahalok aat ba NAI Maromak.”
Nunee Ita Boot hamoos tiha hau nia sala hodi halo hau livre.
6 Nee duni diak liu ema nebee foo laran ba Ita Boot aproveita harohan ba Ita Boot
durante sira sei bele.
Bainhira bee boot sae,
sei la too iha sira.
7 Ita Boot mak hau nia subar fatin;
Ita Boot kuidadu hau para susar la bele kona hau.
Ema sei haleu hau hodi haklalak hahii Ita Boot
tanba Ita Boot salva ona hau.
8 Hau sei hanorin o hodi hatudu dalan ba o;
Hau sei sai o nia matadalan hodi tau matan ba o.
9 Keta neon-laek hanesan kuda ka kuda buru,
tenki tau tali ba iha nia ibun laran para bele domina nia;
se lae nia la halo tuir o nia hakarak.
10 Ema aat hetan terus barak,
maibee NAI Maromak nia domin rohan-laek haleu ema nebee mak konfia iha Nia.
11 Imi nebee moris loos, haksolok ho kontenti tanba NAI nia diak;
imi nebee laran moos, haklalak ho hananu ba!