33
Hahii adora Nai Maromak
1 Imi nebee moris loos, haklalak ba NAI Maromak;
ema laran moos hahii Nia, nee buat furak ida.
2 Toka viola hodi hahii NAI;
halo muzika ba Nia ho viola tali sanulu.
3 Hananu kantiku foun ba Nia;
toka di-diak muzika hodi haklalak.
4 Tanba NAI Maromak nia liafuan loos;
Nia sempre halo buat nebee loos.
5 NAI gosta lia loos ho justisa;
Nia domin rohan-laek halo nakonu mundu rai klaran.
6 NAI Maromak koalia deit, lalehan iha;
Nia huu deit iis husi ibun, loro matan, fulan ho fitun mosu.
7 Nia butuk hamutuk tasi been iha fatin ida;
Nia haloot tasi been iha armazen laran.
8 Mundu tomak, hamtauk NAI Maromak ba;
ema hotu iha mundu, admira ba,
9 tanba Nia koalia deit, buat hotu iha;
Nia foo orden deit, buat hotu hamriik metin.
10 NAI Maromak teri netik tiha nasaun jentiu sira nia planu;
Nia halo povu jentiu sira nia hakarak la sai realidade.
11 Maibee NAI nia planu dura nafatin ba nafatin;
buat nebee Nia laran hakarak, sempre realiza husi jerasaun ba jerasaun.
12 Nasaun nebee rekonhese katak NAI mak sira nia Maromak, sira hetan ksolok;
povu nebee Nia hili sai Ninian, sira hetan bensaun.
13 NAI Maromak hateke tuun husi lalehan
hodi haree ema hotu-hotu;
14 husi Nia kadeira ukun, Nia fihir
buat hotu nebee moris iha mundu.
15 Nia mak foo neon ba ema hotu;
Nia hatene buat hotu nebee sira halo.
16 Liurai ida bele iha militar barak too iha nebee mos, sira la bele salva nia;
funu nain ida bele iha forsa boot too iha nebee mos, sei la ajuda nia.
17 Ema laran metin ba kuda forti ida atu manaan funu, laran metin saugati;
kuda bele makaas too iha nebee mos, la bele salva nia.
18 Maibee NAI Maromak nia matan hateke ba ema nebee hamtauk Nia;
Nia tau matan ba ema nebee laran metin ba Nia domin rohan-laek,
19 atu salva sira husi mate;
atu foo moris ba sira iha tempu rai hamlaha.
20 Ita hein ho laran metin ba NAI Maromak;
Nia mak tulun ita no defende ita.
21 Ita nia laran haksolok,
tanba ita konfia Nia naran santu.
22 NAI, haraik Ita Boot nia domin rohan-laek nafatin mai ami,
tanba ami laran metin ba Ita Boot.