34
Hahii Nai Maromak tanba Nia foo mahon ba ita
Salmu David nian, bainhira nia finji bulak iha Abimelek nia oin, nunee Abimelek duni sai nia.
1 Hau sei foti aas NAI Maromak iha hau nia moris tomak;
hau nia ibun sei hahii nafatin Nia.
2 Hau sei hahii adora NAI;
ema kbiit-laek sira, rona hodi haksolok ba.
3 Mai ita hamutuk foti aas NAI nia naran;
hamutuk ho hau tane aas Nia.
4 Uluk hau harohan ba NAI Maromak, Nia hataan hau;
Nia salva tiha hau husi buat hotu nebee hatauk hau.
5 Ema nebee hateke ba Nia sei kontenti haksolok;
sira nunka atu moe.
6 Iha tempu nebaa hau, ema kbiit-laek nee halerik, NAI Maromak rona hau;
Nia hasai hau husi terus hotu-hotu.
7 NAI nia anju harii nia tenda
haleu ema nebee hamtauk Maromak
hodi salva sira.
8 Mai koko hodi haree NAI nia diak;
ema nebee hamahon aan iha Nia, sira hetan ksolok.
9 Imi NAI Maromak nia povu, hamtauk Nia ba,
tanba ema nebee hamtauk Nia, sira la falta buat ida.
10 Liaun karik bele hamlaha tanba la hetan hahaan,
maibee ema nebee buka NAI Maromak, buat diak ida la falta ba nia.
11 Oan sira, mai rona hau nia liafuan;
hau sei hanorin imi oinsaa hamtauk NAI Maromak.
12 Imi sira nee, see mak buka moris diak,
no hakarak teb-tebes atu hetan moris naruk ho haksolok?
13 Tenki kuidadu imi nia ibun para la bele koalia aat,
no la bele koalia bosok.
14 Fila kotuk ba buat aat hodi halo buat nebee diak;
hakaas aan atu moris dame malu ho ema hotu-hotu, buka nafatin dame too hetan.
15 NAI Maromak tau matan ba ema nebee mak moris loos;
Nia see tilun ba sira nia halerik.
16 Maibee NAI kontra ema nebee mak halo aat,
too hasai tiha sira nia naran husi mundu.
17 Ema moris loos halerik, NAI rona sira;
Nia hasai sira husi sira nia susar.
18 NAI besik ba ema nebee laran dodok;
Nia salva ema nebee lakon esperansa.
19 Ema moris loos hetan terus oi-oin,
maibee NAI Maromak hasai sira husi terus hirak nee hotu.
20 Nia kuidadu ema nee nia ruin tomak;
ruin ida mos la tohar.
21 Ema aat sei mate ho nia hahalok rasik;
see mak odi ema moris loos, sira sei hetan kastigu.
22 NAI Maromak sei salva Nia atan sira;
ema nebee buka mahon iha Nia, la iha ida mak hetan kastigu.