35
Orasaun husu tulun bainhira hasoru inimigu
Salmu David nian.
1 NAI Maromak, ema nebee halo funu hasoru hau, Ita Boot halo funu hasoru sira ba;
ema nebee ataka hau, Ita Boot ataka sira ba.
2 Kaer metin ekipamentu funu nian hodi satan netik hau;
hamriik hodi mai tulun hau.
3 Foti Ita Boot nia diman ho baliu funu nian
kontra ema nebee mak duni tuir hau.
Hatete mai hau katak,
Ita Boot mak hau nia Salvador.
4 Hau harohan atu ema nebee hakarak halakon hau nia vida
sai moe boot ho oin tuun.
Hau husu atu ema nebee hanoin aat mai hau
hakiduk ho oin mean.
5 Haruka NAI nia anju duni sai tiha sira
hanesan anin huu lakon hare kulit.
6 NAI nia anju duni hela sira,
husik dalan nebee sira liu sai nakukun ho namdoras.
7 Tanba sira subar lasu mai hau maski hau la sala;
maski hau la sala, sira kee rai kuak mai hau.
8 Hau harohan atu dezastre boot kona sira derepenti;
husik sira monu ba iha lasu nebee sira rasik monta mai hau;
husik sira mate mohu iha rai kuak laran.
9 Nunee hau nia laran sei haksolok;
hau sei kontenti tanba NAI Maromak salva ona hau.
10 Ho hau nia aan tomak hau sei deklara,
“NAI, see mak hanesan Ita Boot?!
Ita Boot salva kbiit-laek sira husi ema nebee forsa liu sira;
ema kiak ho ema kbiit-laek sira nebee ema hanehan, Ita Boot tulun sira.”
11 Ema aat sira hamriik foo sasin falsu hasoru hau;
sira husu hau kona ba buat nebee hau la hatene.
12 Hau nia diak, sira selu fali ho hahalok aat;
hau tristi teb-tebes.
13 Uluk sira moras, hau hatais hena lutu
hodi haraik aan ho jejun.
Hau hakruuk hodi harohan
14 hanesan fali hau harohan ba hau nia belun ka hau nia maun-alin.
Hau hakruuk hodi tanis ho laran susar
hanesan fali hau tanis halerik ba hau nia inan.
15 Maibee bainhira hau monu, sira hotu kontenti;
sira haleu hau hodi hatete aat hau.
Ema fuik nebee hau la konhese
koalia aat hau la para.
16 Ema nebee la fiar Maromak, tarata aat hau;
sira ruun nehan mai hau.
17 NAI Maromak, Ita Boot hateke deit nunee too bainhira?
Salva hau tanba sira ataka hau;
salva hau nia moris husi liaun sira nee.
18 Depois hau sei agradese ba Ita Boot iha povu nia leet;
hau sei hahii Ita Boot iha ema lubun boot nia klaran.
19 Keta husik hau nia inimigu bosok-teen sira nee haksolok fali ho hau nia terus.
Sira odi hau maski hau la sala; keta husik sira baku matan ba malu kona ba hau.
20 Sira la koalia liafuan dame nian,
maibee sira konta fali istoria falsu
kontra ema sira nebee hela hakmatek iha rai nee.
21 Sira halo ibun luan hodi hatete,
“Ha! Buat nebee o halo, ami haree rasik ho matan.”
22 NAI Maromak, Ita Boot haree ona ida nee; keta nonook deit;
Nai, keta dook husi hau.
23 Hadeer ona, hamriik hodi defende hau;
hau nia Nai, hau nia Maromak, sai hau nia Defensor ba!
24 NAI hau nia Maromak, Ita Boot sempre halo buat nebee loos;
deklara ba katak hau la sala ida.
Keta husik sira haksolok fali ho hau nia terus.
25 Keta husik sira dehan ba malu,
“Haree ba, saida mak ita hakarak nee akontese tiha ona!”
Keta husik sira dehan,
“Ita tolan tiha ona nia.”
26 Hau harohan atu ema nebee kontenti bainhira susar kona hau,
sira sai moe too bilaan tiha;
husik ema nebee mak foti aan hasoru hau,
sira moe boot ho oin tuun.
27 Hau harohan atu ema nebee hakarak haree hau manaan justisa,
ema sira nee haklalak ho haksolok hodi hatete fila-fila,
“NAI Maromak nee boot!
Nia kontenti bainhira Nia atan hetan diak.”
28 Hau nia ibun sei foo sai Ita Boot nia justisa;
loron-kalan hau sei hahii Ita Boot.