36
Ema aat nia sala ho Nai Maromak nia diak
Husi NAI Maromak nia atan David. Ba dirijenti koru.
1 Ema aat sira nia hahalok aat sai fali matadalan ba sira;
ema sira nee la hatene hamtauk Maromak.
2 Iha sira nia matan rasik, sira diak loos,
too sira la haree sira nia sala, no la hakribi sira nia hahalok.
3 Liafuan nebee sai husi sira nia ibun mesak aat ho bosok;
sira lakohi halo tan buat nebee mak diak ho buat nebee loos.
4 Maski iha sira nia toba fatin mos, sira planu buat aat;
sira tau sira nia aan iha dalan nebee la loos;
sira nunka fila kotuk ba buat aat.
5 NAI Maromak, Ita Boot nia domin too iha lalehan aas ba;
Ita Boot nia lia loos too iha kalohan.
6 Ita Boot nia diak hanesan foho aas sira;
Ita Boot nia justisa hanesan tasi nia klean.
NAI, Ita Boot foo mahon ba ema ho mos ba animal.
7 Maromak, Ita Boot nia domin folin boot;
ema hotu hamahon aan iha Ita Boot nia liras okos.
8 Sira haan too bosu ho hahaan diak nian husi Ita Boot nia uma;
Ita Boot foo bee ksolok nian husi Ita Boot nia mota ba sira hemu.
9 Tanba Ita Boot mak buat moris hotu nia huun;
husi Ita Boot nia naroman ami bele hetan naroman.
10 Foo domin nafatin ba ema nebee mak konhese Ita Boot;
foo Ita Boot nia justisa ba ema nebee mak moris loos.
11 Keta husik ema foti aan sira sama hau;
la bele husik ema aat sira nia liman duni lakon hau.
12 Haree ba, ema aat sira nee monu oinsaa;
sira monu tuun ba rai too la bele hamriik fali!