37
Keta laran moras ba ema aat
Salmu David nian.
1 Keta preokupa ho ema aat sira;
keta laran moras ba ema nebee halo sala.
2 Tanba sira hanesan duut nebee fasil namlaik;
sira sei mate hanesan ai matak nebee la kleur maran tiha.
3 Fiar ba NAI Maromak no halo buat nebee diak;
hela iha rai nee ho hakmatek.
4 Buka o nia ksolok husi NAI
mak Nia sei foo buat nebee o nia laran hakarak.
5 Entrega o nia moris ba NAI Maromak;
fiar ba Nia mak Nia sei halo ida nee ba o:
6 Nia sei leno sai o nia hahalok loos
hanesan loro matan dadeer nian leno rai;
ema sei haree katak o nee loos hela,
hanesan ema haree loro matan meudia nian.
7 Hakmatek iha NAI Maromak nia oin ba;
pasiensia hodi hein Nia.
Keta preokupa ema nia planu aat;
lalika laran susar bainhira ema aat hetan moris diak.
8 Hadook aan husi hirus, keta laran nakali;
lalika preokupa, nee sei lori o ba dalan aat.
9 Tanba ema aat sei lakon mohu,
maibee ema nebee laran metin ba NAI Maromak, sira sei hela nafatin iha rai nee.
10 La kleur tan, ema aat sira nee sei mohu tiha;
o buka sira mos la hetan.
11 Maibee ema nebee haraik aan sei hela metin iha rai nee;
sira sei moris haksolok iha pas ho hakmatek nia laran.
12 Ema aat halo planu foer hasoru ema nebee moris loos
hodi ruun nehan ba sira.
13 Maibee NAI Maromak hamnasa fali ema aat sira nee,
tanba Nia hatene katak sira nia loron besik ona.
14 Ema aat losu sai sira nia surik
no dada sira nia rama
atu hamonu ema kiak ho kbiit-laek sira,
atu hamate ema nebee lao tuir dalan loos.
15 Maibee sira nia surik sei sona borus fali sira nia fuan rasik;
sira nia rama sei silu tohar.
16 Diak liu moris loos ho sasaan uitoan deit
duke sai ema aat ho riku-soin barak.
17 Tanba ema aat sira nia liman sei silu tohar,
maibee NAI Maromak tane ema nebee moris loos.
18 NAI Maromak tau matan ba ema laran moos;
rai nebee Nia foo ba sira sai sira nian nafatin ba nafatin.
19 Iha tempu susar, sira laos mes-mesak;
rai hamlaha, sira hetan hahaan too bosu.
20 Maibee ema aat sei mate mohu.
NAI Maromak nia inimigu hanesan ai funan iha rai fuik;
sira sei mohu, sei mohu lakon hanesan ahi suar.
21 Ema aat empresta, la foo fila,
maibee ema nebee moris loos gosta foo ba ema.
22 Ema nebee NAI Maromak foo bensaun, sira sei hela metin iha rai nee,
maibee ema nebee Maromak foo malisan, sei lakon mohu.
23 Ema nebee halo haksolok NAI Maromak nia laran,
Maromak sei hatudu dalan ba nia.
24 Maski nia sidi maibee nia la monu,
tanba NAI kaer metin nia liman.
25 Hori uluk hau sei joven too agora hau katuas ona,
hau seidauk haree Maromak husik ema laran moos moris mesak;
hau seidauk haree sira nia oan sira tane liman hodi husu hahaan ba ema.
26 Sira foo ho laran luak no sempre prontu foo sasaan ba ema empresta;
sira nia oan sira sai bensaun ba ema.
27 Fila kotuk ba buat aat hodi halo buat diak,
nunee o sei hela iha rai nee tinan ba tinan.
28 Tanba NAI Maromak gosta justisa;
ema nebee foo laran ba Nia, Nia nunka husik mesak.
Ema aat sira sei rahun hotu;
sira nia jerasaun sei lakon mohu.
29 Ema moris loos sei hela metin iha rai nee;
sira sei horik iha rai nee tinan ba tinan.
30 Ema moris loos nia ibun foo sai buat matenek nian;
nia nanaal hatete buat nebee loos.
31 Nia rai Maromak nia lei iha nia laran;
nia ain sei la sidi.
32 Ema aat hafuhu ema moris loos
hodi buka dalan atu oho sira.
33 Maibee NAI Maromak sei la husik sira iha ema aat nia liman laran;
ema lori sira too iha tribunal mos, Maromak la husik juis hamonu kastigu ba sira.
34 Laran metin ba NAI Maromak;
lao tuir nafatin Nia dalan.
Nia sei foti o hela metin iha rai nee;
bainhira ema aat mohu hotu, o sei haree.
35 Hau haree ona ema aat sira hanehan ema;
ema aat sira nee moris buras hanesan ai huun boot.
36 Maibee hau liu tan husi nebaa, sira la iha tiha ona;
maski hau buka sira, la hetan tan.
37 Hateke ba ema nebee laran moos; haree ba ema nebee moris loos.
Tanba ema nebee mak buka dame sei hetan futuru nebee diak.
38 Maibee sala nain sira sei mate mohu;
ema aat sira nia futuru sei la iha.
39 NAI Maromak mak salva ema nebee moris loos;
iha tempu susar, Nia mak sira nia subar fatin.
40 NAI tulun sira hodi lori sira sai;
Nia hasai sira husi ema aat hodi salva sira,
tanba sira buka mahon iha Nia.