38
Ema moras halerik husu tulun
Salmu David nian, husu Maromak atu hanoin nia.
1 NAI Maromak, maski Ita Boot hirus hela hau, maibee keta siak hau;
maski Ita Boot nia laran nakali hela, maibee keta kastigu hau.
2 Ita Boot nia rama oan tama ona hau nia isin;
Ita Boot nia liman hanehan hela hau.
3 Ita Boot nia laran nakali halo hau nia isin sai moras hotu;
hau nia sala halo hau nia isin lolon tomak sai fraku tiha.
4 Hau mout tiha iha hau nia hahalok aat nia laran;
hau senti hau nia sala todan liu ona.
5 Hau nia hahalok beik
halo hau nia kanek sai dodok dois.
6 Hau hakruuk too bonko;
loro-loron hau laran susar hela deit.
7 Isin manas sunu hau nia aan tomak;
hau nia isin sai moras hotu.
8 Hau la bele liu ona; hau nia forsa mohu ona;
hau laran dodok hodi halerik.
9 Nai Maromak, Ita Boot hatene hotu hau nia hakarak;
Ita Boot rona hau nia halerik.
10 Hau nia fuan nakdedar; hau nia forsa la iha ona;
hau nia matan sai malahuk tiha ona.
11 Hau nia belun sira ho maluk sira lakohi besik hau tanba hau nia kanek,
too hau nia familia sira mos hamriik husi dook deit.
12 Ema nebee hakarak oho hau monta lasu mai hau;
ema nebee hakarak halo terus hau kombina malu atu hamonu hau;
loro-loron sira halo manobra tuun-sae.
13 Hau hanesan fali ema tilun diuk, la bele rona buat ida;
hau hanesan ema monok, la hatene koalia.
14 Hau hanesan ema nebee la rona buat ida;
hau hanesan ema nebee la bele foo resposta.
15 NAI Maromak, hau hein hela Ita Boot;
Nai, hau nia Maromak, Ita Boot sei hataan hau,
16 tanba hau husu tiha ona ba Ita Boot dehan,
“Keta husik sira haksolok fali ho hau nia terus
ka foti aan hasoru hau bainhira hau monu.”
17 Hau besik atu monu;
hau terus la hotu.
18 Hau foo sai hau nia sala;
hau nia hahalok aat halo hau la hakmatek.
19 Hau nia inimigu sira mesak bo-boot deit;
iha ema barak teb-tebes odi hau, maski hau la halo buat aat ba sira.
20 Hau nia hahalok diak, sira selu fali ho hahalok aat;
sira kontra hau tanba hau hakarak halo buat nebee diak.
21 NAI Maromak, keta husik hau mesak;
hau nia Maromak, keta dook nafatin husi hau.
22 Hau nia Nai, hau nia Salvador,
mai lalais hodi tulun hau.