39
Ita ema nia moris badak deit
Salmu David nian, ba dirijenti koru Jedutun.
1 Iha tempu ida hau dehan, “Hau sei kuidadu hau nia lalaok
atu hau nia ibun la bele koalia sala;
bainhira ema aat iha hela hau nia oin,
hau sei taka hau nia ibun.”
2 Hau nonook deit,
la hatete buat ida; atu koalia buat diak mos lae.
Maski hau nonook, maibee hau nia laran susar ba beibeik;
3 hau nia fuan la hakmatek.
Hau hanoin hela, hau nia neon aumenta susar
too hau loke ibun hodi koalia:
4 “NAI Maromak, foo hatene took mai hau kona ba hau nia destinu,
no hau moris too tinan hira;
foo hanoin mai hau katak, hau nia moris badak deit.
5 Ita Boot halo hau nia tinan badak hanesan sasukat liman ida-rua deit.
Tuir Ita Boot haree, hau nia vida tomak hanesan buat malahuk ida,
hanesan fali anin nebee huu liu deit.
6 Loos duni, ema kriatura hanesan lalatak nebee liu ona;
sira moris fadigadu hela hodi rai riku-soin,
maibee saugati deit;
sira la hatene aban-bainrua see mak atu hetan riku-soin nee.
7 Nai Maromak, agora hau hein tan saida?
Hau laran metin ba Ita Boot.
8 Hasai hau husi hau nia hahalok aat hotu;
keta husik ema beik hamnasa fali hau.
9 Hau nonook, la loke hau nia ibun,
tanba Ita Boot rasik mak halo ida nee mai hau.
10 Hasai tiha Ita Boot nia kastigu husi hau;
hau la bele ona, tanba Ita Boot nia liman baku hela hau.
11 Bainhira Ita Boot siak ema
hodi kastigu nia tanba nia sala,
Ita Boot estraga tiha nia riku-soin hanesan fali ular mak haan.
Loos duni, ema hotu-hotu nia moris hanesan anin nebee huu liu deit.
12 NAI Maromak, rona hau nia orasaun;
see tilun mai hau nia halerik husu tulun;
keta fila kotuk ba hau nia matan been.
Tanba hau iha nee hanesan Ita Boot nia bainaka ida;
hau ema lao rai hanesan hau nia bei-ala sira.
13 Hasees tiha Ita Boot nia oin husi hau,
atu hau bele kontenti fali
molok hau baa no la iha tan.”