40
Orasaun agradese no husu tulun
Salmu David nian, ba dirijenti koru.
1 Hau hein NAI Maromak ho pasiensia;
too ikus Nia fila oin mai hau hodi rona hau nia halerik.
2 Nia foti hau sai husi rai kuak perigu nian;
Nia hasai hau husi tahu boot nia laran.
Nia tau hau nia ain iha fatuk leten
hodi foo fatin seguru atu hau hamriik metin.
3 Nia tau knananuk foun iha hau nia ibun,
kantiku hodi hahii ita nia Maromak.
Ema barak sei haree;
sira sei hamtauk NAI Maromak hodi konfia Nia.
4 See mak konfia NAI Maromak,
see mak la sadere ba ema nebee foti aan,
see mak la lao hamutuk ho ema nebee adora maromak falsu,
ema sira nee mak hetan ksolok.
5 NAI, hau nia Maromak,
Ita Boot halo tiha ona buat furak barak mai ami;
Ita Boot nia planu ba ami nia moris mos boot.
La iha ida mak hanesan Ita Boot;
hau atu konta sai buat nebee Ita Boot halo,
barak teb-tebes, hau sura la bele.
6 Ita Boot nia hakarak laos atu ema lori oferta no oho animal sai sakrifisiu ba Ita Boot;
Ita Boot la presiza animal nebee ema tunu halo sakrifisiu.
Ita Boot la husu sakrifisiu nebee ema foo hodi husu perdaun,
maibee Ita Boot loke ona hau nia tilun.
7-8 Entaun hau dehan, “Maromak, hau mak nee, hau mai ona.
Hau gosta teb-tebes halo tuir Ita Boot nia hakarak,
hanesan hakerek ona kona ba hau iha Livru Sagradu.
Ita Boot nia lei iha hela hau nia laran.”
9 NAI Maromak, hau foo sai tiha ona iha povu nia leet katak
Ita Boot salva ami.
Ita Boot hatene katak
hau la taka hau nia ibun.
10 Hau la subar Ita Boot nia lia loos iha hau nia laran;
hau koalia sai katak Ita Boot sempre foo laran ba Ita Boot nia povu, Ita Boot mak Salvador.
Hau la taka ba ema lubuk boot katak,
Ita Boot sempre hadomi Ita Boot nia povu no kaer metin Ita Boot nia liafuan.
11 NAI Maromak, keta taka Ita Boot nia laran luak mai hau;
halo Ita Boot nia domin ho Ita Boot nia lia loos hamahon hau nafatin.
12 Tanba susar nebee haleu hau barak teb-tebes, hau sura la bele;
hau nia sala butuk aas liu ona, halo hau la haree rai;
hau nia sala barak liu fali hau nia fuuk lahan;
hau nia forsa la iha tiha.
13 NAI Maromak, favor salva hau;
NAI, mai lalais tulun hau ba.
14 Hau harohan atu ema hotu nebee hakarak hasai hau nia vida
moe boot ho oin tuun;
husik ema nebee hakarak atu hau hetan dezastre
hakiduk ho naran aat.
15 Husik ema nebee hamnasa hahaek mai hau
sai moe boot too bilaan tiha.
16 Maibee halo ema hotu nebee harohan ba Ita Boot
sai kontenti ho haksolok;
husik ema nebee buka Ita Boot nia salvasaun dehan beibeik,
“NAI Maromak nee boot!”
17 Hau nee ema kiak ho kbiit-laek,
maibee Nai Maromak hanoin hau.
Ita Boot mak tulun hau no salva hau;
hau nia Maromak, keta demora.